Ilisimatusarfittaartikkusuppaatigut

Ilisimatusarfik nutaaq nunatsinni pilersinniarneqarpoq.

Ilisimatusarneq pillugu ministeri Helge Sander silap pissusia pillugu ilisimatusarfissamik pilersitserusuppoq.

Ullut 2000-it matuma siorna Ilisimatusarneq pillugu ministereqarfik pilersinneqarpoq. Tamanna malunnartinniarlugu ministereqarfiup ilaatigut pilersaarutit saqqummiuppaat.

Ilisimatusarfissarfimmik silaannaap allanngoriartorneranik aamma avatangiisit pillugit ilisimasanik katersuiffiusussamik pilersitsinissaq pilersaarutigineqarpoq.

Nunatsinni eqqaanilu piffissami kingullermi aggersumilu aatsaat taama ilisimatusartigisoqalerpoq.

Nunat tamalaat issittumi ilisimatusarnikkut ukiorititaat aallartereerpoq, Ilisimasassarsiornerup Galatheap paasisarpassuit nutaat nalunaarsuinerillu nutaat Danmarkimut apuuteqqammerpaat.

Taamaammat ilisimatusarnermut ministereqarfiup pisusissamisoorsoraa nunatsinni silaannaq pillugu ilisimatusarfeqalernissaa.

- Kalaallit Nunaanni maanna mikisunnguamik ilisimatusarfeqareerpoq, tassunga attuumassuteqartumik imaluunniit ilisimatusarfimmik allarluinnarmik pilersitsinissaq maanna eqqarsaatigaarput, taama oqarpoq Ilisimatusarneq pillugu ministeri Helge Sander.

Ilisimatusarfissap silaannaap allanngoriartorneranut paasisat tamaasa aamma avatangiiseq pillugu paasisat katersuuffigissavaat.

- Kalaallit Nunaanni silaannaap allanngoriartornera malunnaateqarluinnarmat pissusissamisoorsoraara Ilisimatusarfissaq nutaaq kalaallit nunaanniissasoq, Helge Sander oqarpoq.

Ilisimatusarfimmik pilersitsinissamik pilersaarutit piaartumik naammassineqarnissaat Helge Sanderip kissaatiginartillugu aamma oqaatigaa.

Naatsorsuutigineqarpoq aningaasartuutissat aamma ilisimatusarfiup sumi inissinneqarnissaanik paasissutissat ukioq una naatinnagu saqqummiunneqarnissaat.