Ilisimatusarfissarsuaq sananeqaannaleqaaq
Ilisimatusarfissarsuup Ilimmarfiup 2007-mi sananeqarnissaa naalakkersuisut siunniuppaat, inatsisartullu ippassaq tamanna aalajangiiffigaat.
Aalajangerneq tamanna pitsaasuusoq ukiup aappassaa palasissatut ilinniartup Peter Olsen Lennert-ip nuannaarutigaa.
- Isumaqarpunga tamanna pitsaasuusoq, pissutigalugu 1986-mi allaffimmiuutillunga Ilisimatusarfiup Noorlerniilernissaanut pilersaarusiortoqarmat piareersaaqataaninni siunertaavoq ilinniartut 20-t ilinniartuusassasut. Ilisimatusarfimmi ilinniartut maannakkut 120-30-it missaanniipput.
Palasitut ilinniartut maanna aqqaniliuvugut, ineerannguamilu atuartarpugut inunnut sisamanut naatsorsuussami. Inissaqannginnatta illoqarfimmi attartorluta ilinniariartortariaqartarpugut, kantiinalu inunnut qulinut naatsorsuussaavoq, taamalilluta ilinniartunik allanik oqaloqateqarsinnaanissaraluarput annaasarparput. Isumalluarnaqaaq ilinniarnitsinnilu avatangiiserissaalernissarput isumalluarfigalugu, Peter Olsen Lennert qilanaalereeqqasoq Radioaviisimut taama unnersiorpoq.
