Ilisimatusarfissaq Nuuk Basic

Ilisimatusarfiup nutaap Tunup avannaani ilisimatusarfimmut maannamut piusumut Zackenbergimut ukiut ingerlaneranni ilanngunneqartussaq Nuup kujataani ilusinikkiartorpoq.

Amerallip kangerluani ilisimatusarfik ukiut marlussuit qaangiuppata naammassillugu napparneqassaaq taaguuteqarlunilu Nuuk Basic.

Ilisimatusarfik silap allanngoriartornerata kinguneranik pinngortitap ataqatigiiaarnerani suut allannguutigineqarnersut pillugit ilisimatusarnermut tunngaviussaaq. Nunap naasui, nunap sananeqaataa, imaq silalu Nuuk Basicimiit misissorneqarlutillu ilisimatusarfigineqassapput. Tamatumunngalu peqatigitillugu misissuinermi inernerit tamarmik kikkunnulluunniit tamanut qarasaasiakkut nittartakkamut - ilisimatusarnermi misissuinermi inernerit takkuttut peqatigalugit - pilersinneqartussakkut saqqummiunneqartassapput.

Pinngortitaleriffiup pisortaata Klaus Nygaardip oqaatigaa ukioq manna suliassatut pilersaarutip, Pinngortitaleriffiup, Asiap, Københavnimi Universitetip ammalu Danmarkimi DMU-p suleqatigiinnerisigut ingerlanneqartussap, aallarnisarneqarneranut 5 mio. kr.-it aningaasaliissutaareersut.

Aammattaaq Danmarkimi Miljøstyrelsip -Avatangiisinut aqutsisoqarfiup - ilisimatusarfissap Nuuk Basicip ingerlanneqarneranut 5 mio. kr.-it ukiut tamaasa aningaasaliissutigisarniarpai.

Aage V. Jensenip Aningaasaateqarfia aammattaaq Amerallip kangerluani ilaatigut illuaqqanik marlunnik sananissamut 3 mio. kr.-inik aningaasaliissuteqarput.