Ilisimatusarfimmiut ernumassutissaqanngitsut
Ilinniartitaanermut pisortaqarfimmi pisortaq Lise Lennert Olsen oqarpoq.
Inatsisartut Ilisimatusarfimmut tunngatillugu inatsisissaannut allannguutissatut siunnersuut uperuarneqaqattaartoq radioavisimi ulluni kingullerni sammivarput. Ilinniartitaanermulli pisortaqarfimmiut isumaqarput oqallinnerit paatsuuinermik tunngaveqartut.
- Paatsuuinerit aallaaviat tassaavoq Ilisimatusarfimmi rektorimik taassumalu tullersortissaanik atorfinitsisisarnernut piumasaqaatit allannguiffigineqarnerat. Kisianni nunarsuarmi tamarmi periutsinik akuerisaasunik Ilisimatusarfimmi ingerlatsineq tunngaveqartuassaaq, Lise Lennert Olsen oqarpoq.
Allannguutissatut siunnersuummi rektor-imik taassumalu tullersortissaanik atornitsitsinermi ilisimatusarsimanissamik piumasaqaat allanngortinniarneqarpoq, nutaatut piumasaqaatinngortinniarneqarluni siunissami atorfinitsinneqartartussat kandidatitut ilinniarsimasuunissaat. Tamatuma saniatigut Kalaallit Nunaanni pissutsinik ilisimasaqassapput ilinniartitaanermullu pissutsinik paasisimasaqassallutik.
- Piumasaqaatit allanngortinniarneqarneranni anguniarneqarpoq qinnuteqartartut amerlanerulernissaat, tassami ilisimatuutut akuerineqarsimasut nunatsinnilu pissutsinik ilisimasallit qinnuteqarsinnaasut ikittuinnaammata.
- Allannguiniarneq imaanngilaq Ilisimatusarfimmi ilinniartitaanernik ajornerulersitsissasoq. Qularineqassanngilaq Ilisimatusarfimmi ukiortaamit 2008-mit ilinniartitsinerit ilisimatusarnernik tunngaveqassammata, taakkulu aamma nunarsuarmi tamarmi periutsinik akuerisaasunik tunngaveqassammata.
Ilisimatusarfimmi ilinniartut ualeru nalunaaqutaq sisamanut pisut ataatsimiissutigissavaat.