Ilisimatusarfimmi siulersuisut IMAK-imut akissuteqarput
IMAK-ip siulittaasuata Sivso Dorphip oqaasii Ilisimatusarfiup siulersuisuinit illuatungilerneqarput. Sivso Dorph naapertorlugu Inerisaaviup 2008-miit 2009-mut nuutittariaqarsimavai atuarfiit pisortaasa ataatsimiinnissaat, soorlu aamma meeqqat atuarfiisa ineriartortinneqarnissaat pillugit pikkorissaatitsinissat Sivso Dorph naapertorlugu taamaatiinnarneqartariaqarsimasut. Atuarfitsialaap ineriartuaartinneqarneranut tamakku ipititsisuusut IMAK-ip aamma oqaatigaa, Ilisimatusarfimmili siulersuisut tamanna ilumuunnginnerarpaat:
- Inerisaaviup 2008-imiit 2009-mut nuutittariaqarsimavai atuarfiit pisortaasa ataatsimiinniissat kiisalu taamaatiinnartariarsimallugit atuarfinni siulersuisut nunaqarfinnilu atuarfiit pisortaasa pikkorissarnissaat aammalu ungasianniit atuartitsineq pillugu isumasioqatigiinnissaq. Taamaasiornermut ATTAT-mut aningaasartuutit ukioq manna qaffariarujussuarnerat kisimi peqqutaavoq, siulersuisut allapput, nangippullu:
- Siuilersuisut pasillerneqarlutik pisuutinniarneqarnerat ” nunatsinni atuarfiup ineriartorneranut ipititsiartuaarnermi aallarniutaannaasoq, atuarfitsialammut” eqqunngilaq, siulersuisut allapput.
Inerisaaviup Ilisimatusarfiullu aningaasanik atugassaanik qarajaalermata siulersuisut inassuteqarput ATTAT-mut aningaasartuutit piaarnerpaamik Inerisaaviup taamalu Ilisimatusarfiup kontoaniit peerneqassasut. Siulersuisut paasivaattaaq ATTAT-ip siunissaa pitsaasusissaalu Namminersornerullutik Oqartussani politikkikkut tunngaviusumik aalajangiiffigisariaqartoq.