Ilisimatusarfimmi siulersuisunngortut iluarisimaarneqarput
Ilisimatusarfiup aqunneqarneranut inatsit ukiortaamit atuutilersoq tunngavigalugu siulersuisut aqqanilinnik ilaasortaqartoq inuttalerneqarpoq.
Inatsisip nutaap inatsisartuni oqaaluuserineqarnerani akerleralugu ilinniartut ilinniartsisullu akerliussutsimik takutitsipput.
Siulersuisut nutaat Ilisimatusarfimmi Rektoriusup Aage Rydholt Poulsenip iluarisimaarpai.
Siulersuisunngortut ilinniagaat pisinnaasaallu allaavigalugit toqqaaneq isumatusaarneruvoq.
Ilisimatusarfik taamak angitigisoq taamalu siammasitsigisunik sammisaqarfiusoq aqunniassallugu assigiinngitsunik pisinnaasalinnik siulersuisuini ilaasortanik inuttalersaa eqqarsaatigineqartussavoq.
Aage Rydholdt Poulsen suleqatigiinnissamik qilanaaruteqarpoq.
Ilisimatusarfiup ineriartorteqqinnissaanik siunertaqarlutik siulersuisut pilersinneqarnerat Aage Rydholdt Poulsenip naatsorsuutigilluinnarpaa, taamaalillutik ilinniartitsiisut ilinniartut siulersuisullu assigiimmik soqutigisaqarnerarlugit.
Siulersuisunut ilaasortassanik Ilisimatusarfik 18-nik innersuussaqarpoq. Siulersuisunngortuni aqqaniliusuni naalakkersuisut toqqagaanni ilaasortanngorput, Karla Jessen Williamson kalaaleqaterput Canada-mi
Universitetemi Saskatchewanimi ilisimatuutut ilinniartitsisutullu sulisoq, Anne Knudsen danskit aviisianni Weekendaviisimi aaqqissuisuuneq, kiisalu Namminersornerullutik Oqartussat Danmarkimi sinniisoqarfianni pisortaq Tove Søvndahl Pedersen.
Naalakkersuinikkut toqqakkat tassaapput Robert Mossing Namminersornerullutik Oqartussat kultureqarnermut ilinniartitaanermut ilisimatusarnermut ilageeqarnermullu naalakersuisoqarfimmi atorfilik, kiisalu Arnaq Grove eskimologeq, Mininnguaq Kleis-ilu naalakkersuisut siulitaasoqarfiata allaffeqarfiani atorfilik filosof-itullu ilinnigalik.
