Ilisimatusarfimmi pissutsinik aaqqiisoqarnissaanik rektori neriorsuivoq

- Ilinniartut isornartorsiuinerat tusaalluarpara, aamma iliuuseqarfiginiarlugu qangali aalajangiutereersimavara. Iliuusissat pillugit pilersaarusiornissaq maanna tullinnguuppoq, Ilisimatusarfimmi Ingerlatsinermut institutimi ilinniartut lektorillu pissutsinut isornartorsiuinerannut akissummini Ilisimatusarfiup pisortaa, Tine Pars, taama oqarpoq.

Ilisimatusarfik pillugu inatsit naapertorlugu ilinniartitaanerup qaffasissusaata nunanut allanut sanilliunneqarsinnaanissaa qulakkeernertussaavoq, tamannalu soorunami suliniutigineqartoq Tine Parsip oqaatigaa.

Ilisimatusarfimmi ingerlatsinermut institutimi ilinniartitsinerup pitsaassusaa nunani allani ilinniarfinnut assingusunut naleqqiukkaanni appasinnerusoq, tikeraarlutik ilinniartitsisuusarsimasut arlallit nassuerutigaat, taakkununnga ilaalluni lektori Michael Andersen:

- Kisianni ajornartorsiut marloqiusaavoq, tassami ilinnialersartut aamma pitsaanerusinnaagaluarput, Michael Andersen oqarpoq.

Ingerlatsinermut institutimi ilinniartoq Hanne Rasmussen pissutsinut isornartorsiuisunut ilaavoq:

- Siornatigut asuli nalilersuisuusaartarpugut. Ilinniartuulluni fagit nalilersoruminaattaramik. Suut pisariaqartippagut? Suut ilikkartussaavagut? Allaninngaanniit nalilersuisoqartaraluarpat iluassagaluarpoq, Ilisimatusarfimmi Ingerlatsinermut institutimi ilinniartoq Hanne Rasmussen taama oqarpoq.

Ilinniartitsinermi isummanik allanngortitsiniaasoqarsinnaanera ilinniartut aarleqqutigaat, illuinnaasiortumik atuagassinneqartalernissaq aarleqqutigineqarluni, Tine Parsilli erseqqissaatigaa tamanna pillugu naliliisoqartussanngortoq, aaqqiivigineqarnissaa matumani qulakkeerniarneqarluni:

- Apeqqut taanna tusaqqaarlugu soorunalimi tupannalaarsinnaassaaq, immikkullu sammisassaasariaqassalluni. Isumaqarpungalu pingaaruteqartoq atuakkat ilinniarnermi atorneqartartut naliliiffigineqartariaqartut, suliarlu aallartereerpoq, rektori Tine Pars oqarpoq.