Ilisimatusarfimmi ph.d. kandidatinngortoqarpoq

Inge Høst Seiding naliliisartoqatigiit siulittaasuannit ph.d. Karen Langgårdimit nersualaarneqarpoq, taanna ilaatigut oqarpoq, allaaserisaq Kalaallit Nunaata nunasiaanerata oqaluttuarsartaanik siusinnerusumik pingaaruteqartoq nutaamillu eqqarsarluni suliaasoq.

Ilisimatusarfik 2009-miilli ukiut tamaasa ph.d.-nngortitsisarpoq, Inge Høst Seidingili ph.d.-nngortut tallimaraat. Allaaserisaa naliliisartoqatigiit siulittaasuata Karen Langgårdip saniatigut aamma professor, ph.d. Gunlög Furimit, Sverigemi Linnéuniversitetimeersumit aamma lektor, ph.d. Søren Thuesenimit Danmarkimi Københavns Universitetimeersumit naliliiffigineqarpoq.

- Ilisimatusarfiup ph.d.-nngortitsisarnerata aalaakkaasuunera oqaatigisinnaanngorparput. Ph.d.-nngorniarneq, Ilisimatusarfimmi ilinniagartuunngorniarnerit annersarivaat. Ilisimatusarfimmi ph.d.-nngortut maannakkorpiaq tallimaapput, ukiumullu ph.d.-nngortitsisarnerit amerlisinnaassallutigit neriuutigaarput, rektor Tine Pars oqaluttuarpoq.