Ilisimatusarfimmi nukiit nutaat

Ilisimatusarfiup anguniakkatut kissaatai anguniarlugit, siulersuisuni inuttaasussanik toqqaanermi ilisimatusarnerup, ilinniarnertuut ilinniarfianni ilinniartitsinerup, pitsaassutsimillu qularnaarisinnaasutut tatigineqarlutillu ilisimaneqartut isiginiarneqarput, toqqarneqarlutillu.

Ilisimatusarfimmi siulersuisut nutaat tassaalerput, professori Minik Rosing, tusagassiortoq Elna Egede, Nordisk Ministerrådimi siunnersorti Hulda Zober Holm, professori Peter N. Allerup, dekanip tullia Anne Marie Pahuus kiisalu siulersuisuni ilaareerluni ingerlaqqittoq prfessori Henning Salling Olesen.

Siulersuisunik toqqaanermi Ilisimatusarfimmi ineriartorneq ingerlaannassasoq, kiisalu ilinniartitsinerit ingerlareersut takkukkumaartussallu ineriartorteqqinneqassasut Naalakkersuisunit neriuutigineqarput.
- Siulersuisut taamatut ilaasortaqartinnerisigut ilinniartitaanikkut ilisimatusarnikkullu inuit piginnaanilissuit atorneqalerput tamannalumi Ilisimatusarfimmut iluaqutaassaqaaq, Ilinniartitaanermut Ilisimatusarnermullu Naalakkersuisoq Palle Christiansen tusagassiutinut nalunaarummi oqarpoq.

-Maanna Ilisimatusarfimmi ilinniakkat pitsaasumik ineriartortuarniissaasa qulakkeernissaat suliassarilerparsi” Palle Christiansen nangilluni oqarpoq.

-Siulersuisuulersut  Ilisimatusarfimmi ilinniartitsisutit neqeroorutigineqartut nunani tamalaani qaffasissumik ilinniartitsissutitut pitsaasumik qaffasissuteqarnissaat qulakkiissallugu naammattunik piginnaassuseqartut qularutiginngilara, Palle Christiansen naggasiivoq.

Siulersuisuulersut taaneqartut saniatigut Ilisimatusarfimmi ilinniartitsisunit, ilinniartunit teknikikkullu aqutsisoqarfimmit tallimat siulersuisunut aamma ilanngutissapput.

Siulersuisut akisussaaffigaat Ilisimatusarfiup ilisimatusarnikkut ilinniarnikkullu soqutigisai anguniagaalu pitsaanerpaamik suliniutigissallugit. Taamatuttaaq ineriartortiteqqinnissamut pilersaarusiornissaq.

Siulersuisut Ilisimatusarfiup aningaasaqarnikkut ingerlatsinerat aamma akisussaaffigissavaat.