Ilisimatusarfimmi naliliisoqartarnissaa ilinniartut ujartorpaat

Ilinniartut ilinniarnerminnik nalilersueqataasarnerat ilisimatusarfinni allani nalinginnaagaluarpoq, Ilisimatusarfiulli Ingerlatsinermut institutiani periarfissaq tamanna atorneqarneq ajorpoq, ilinniartut lektorillu ippigisaannik. Ingerlatsinermut insitutimi ilinniartoq Hanne Rasmussen ima oqarpoq:

- Siornatigut asuli nalilersuisuusaartarpugut. Ilinniartuulluni fagit nalilersoruminaattaramik. Suut pisariaqartippagut? Suut ilikkartussaavagut? Allaninngaanniit nalilersuisoqartaraluarpat iluassagaluarpoq, Ilisimatusarfimmi Ingerlatsinermut institutimi ilinniartoq Hanne Rasmussen taama oqarpoq. Atinik taaguinngikkaluarluni ilinniarnermik nalilersuisoqartarnissaa taassuma ujartorpaa.

Ilinniarnermik nalilersuisarneq aalajangersimasumik 2006 tikillugu atorneqanngitsoq, Ingerlatsinermut institutimi pisortaasimasoq lektori Lars Lund oqarpoq, naliliisoqartalernissaali ilinniartunit innersuussutigineqartarsimavoq.

Ilinniartitsisup nammineq aalajangissavaa ilinniarnermik nalilersuisoqartassanersoq, Lars Lundilu oqarpoq nalilersuisalernissamik siorna siunnersuusiortoqaraluartoq, suleqatigiilluarsinnaannginnerup kinguneranik nalilersuisalernissaq studienævnimit aalajangiunneqanngitsoq.

Ingerlatsinermut institutimi siornatigut lektorip Michael Andersenip, Copenhagen Business Schoolimi massakkut lektoriusup oqaatigaa ilinniartut ilinniartitseriaatsimik nalilersuisoqartartuuppata pissusissamisuuginnartutut isigalugu.

- Taamaaliortarnikkut ilinniarneq pitsaanerulissaaq, Michael Andersen oqarpoq.

- Ilinniartitsisarnerit nalilersoqartarnissaat iluarissagaluarpara, ilnniartitseriaatsit pitsaanerulersinneqarsinnaassammata, piumasaqaatillu suut naammassineqassanersut ersarinnerulersinnaaniassammata, lektori Michael Andersen Radioaviisimut oqarpoq.