Ilisimatusarfimmi ilinniartut sumiginnagaasutut misigisimapput

Ilinniartut, sulisut, siulersuisunilu ilaasortat sisamanngormat unnukkut oqallitsinneqarmata ilaatigut tamakku saqqummiunneqarput. Ilinniartut peqatigiiffiat Kisaq oqallitsitsisuuvoq, siulittaasuallu Avijaja Absalonsen ima oqarpoq:

- Ilinniartut puigorneqarsimasutut misigisimapput. Oqallinnermi tamanna erseqqissaatigineqarpoq. Pisut pillugit paasisaqarusupput. Iisimatusarfiup aviisialuunniit aqqutigalugu taamaaliortoqarsinnaavoq, ilinniartut peqatigiiffiata siulittaasua Avijaja Absalonsen adioaviisimut oqarpoq.

Aqutsisuninngaannit paasisitsiniaasoqarnerusinnaanera saniatigut ilinniartitaanerup pitsaassusaa aamma sammineqarpoq.

Pitsaanerusinnaava? Ilinnialersinnaanissamut piumasaqaatit qaffasinnerussappat? Apeqqutit tamakku ilaatigut sammineqarput, Avijaja Absalonsenilli erseqqissaatigaa Ingerlatsinermut institutimi pissutsit siornatigut apeqquserneqarsimasut oqallinnermi sammineqanngitsut.

Ingerlatsinermut institutimi ilinniartitaaneq taamanikkut apeqquserneqaraluarpoq, ilinniartulli isumaat oqallinnermi saqqummiunniarneqarput, Ilisimatusarfimmi pissutsit ataatsimut isigalugit sammineqarlutik.

- Institutit katillugit qulingiluaapput, taakkualu ataatsimut isigalugit oqallippugut. Isornartorsiuisoqaannanngilaq, aamma iluarinnittoqarpoq Avijaja Absalonsen oqarpoq.

Oqallitsitsineq torersumik angusaqarfiusumillu ingerlanneqartoq taassuma oqaatigaa, ilinniartut aqutsisunit tusaaniarneqarsimanerarlugit.

Ilisimatusarfimmik naliliisussamik atorfinitsitsisoqarnikuuvoq, naliliisussarlu oqallinnermi tusarnartuuvoq, pitsanngorsaavigineqartariaqartutullu nalilerneqartut allattorlugit.

Suliniutit suut aqutsisunit maanna aallarnisarniarneqarnersut oqallinnermi saqqummiunneqanngillat, ilinniartulli tusaaniarneqarullutik, Ilisimatusarfimmi ilinniartut peqatigiiffianni siulittaasoq Avijaja Absalonsen naggasiilluni oqarpoq.