Ilisimatusarfimmi ilinniartut qisuariarput

Inatsisartut Ilisimatusarfik pillugu inatsisissatut siunnersuutaat suli eqqissiviilliortitsivoq.
Allattoq Elisa Isaksen
oktobarip 29-at 2007 15:12

Kingulliullutik Ilisimatusarfimmi ilinniartut tusagassiuutinut nalunaaruteqarlutik erseqqissarpaat, Ilisimatusarfimmi pisortatut, pisortap tulliatut immikkoortortanilu pisortatut atorfeqassagaanni ilisimatusarnermik misilittagaqarneq pisariaqarluinnartuusut – tassa naalakkersuisut inatsisissatut siunnersuumminni tamatuminnga isiginngitsuusaarniarnerat akuerineqarsinnaanngitsoq.

- Nunat tamat akornanni malitassat, ilaatigut Aningaasaqarneq pillugu suleqatigiinnissamut aamma ineriartortitsinermut kattuffiup OECD-ip, aalajangersagai Kalaallit Nunaata siunissami malissinnaassanngikkai oqaatigineqarpoq, naak tamanna universitetit siulersorneqarnerannut atatillugu pingaaruteqassusia erseqqissarneqaraluartoq.

Taamaalilluni Kalaallit Nunaat nunani tamalaani universitetit silarsuaanni immikkut isiginiarneqalersinnaavoq aamma Ilisimatusarfimmi ilinniartut ilisimatusartullu nunani allani suliffeqarfinnik pitsaasumik suleqateqarnerat ajornartorsiortinneqalersinnaasoq, ilinniartut allapput.