Ilisimatusarfimmi ilinniartut isummersorput
- Ataatsimut qiviaraanni isumaqarpunga piukkunnarsinnaasutut toqqarneqarsimasut tamarmik assigiinngitsutigut tunuliaqutaqarpasimmata iluarinartuusut, Ilisimatusarfimmi ilinniartoq Steen Jeppson oqarpoq.
- Eqqaamassavarput immaqa Qanoruukkut ilanngutassiarineqaqattaarnikuusoq selsstyrelovip nutaap atuutilernissaanut atatillugu Ilisimatusarfimmiut akerliussutsimik takutitsinerat. Tassani ersersinniarsarivarput atuarnerput politik-imut attuumassuteqassanngitsoq, taama oqariartuuteqarnerput taamanikkut akineqarpoq taamaattoqarnavianngitsoq. Kisianni siulersuisussani nutaani ataaseq politikkimut attuumassuteqarpoq tamannalu apeqquserneqarsinnaavoq, Nivi Olsen oqarpoq.
- Siulersuisunngorsimasut aqqaniliusut inissisimanerat pissanganarpoq, aamma isumaqarpunga piffissaq takoqqaartariaqaripput isornartorsiuilinnginnitsinni. Ilimmarfik nutaajugami, taavalu Ilisimatusarfik illorsuarmut aatsaat taamak nutaaliaatigisumut pissanganartigisumullu nutserluni. Qularnanngitsumik aallaqqaataani imminnut nassaariniaqqaartariaqassapput, tassami suut nutaat tamarmik taamaaqqaartarput, Ilisimatusarfimmi ilinniartut ilaat Aksel Jerimiassen oqarpoq.
Taanna isumaqarnerarpoq taamatut siulersuisuliorneq nunatta oqaluttuarisaanerani aatsaat pimmat tapersersorneqartariaqartoq.
- Avataaninngaanniit uagut ilisimatusarfigineqartarpugut, taava massakkut periarfissaqalerpugut nunatta iluaninngaanniit nunatsinni pissutsit kulturerput, kinaassuserput, ingerlatsineq politikki aningaasarsiorneq allarpassuillu ilisimatusarfigineqarsinnaalerput taakkua aqqutissiuunneqariaqarput tapersersorneqarlutillu, Aksel Jerimiassen oqarpoq.
