Ilisimatusarfimmi ilinniartut aqagu ataatsimiissapput
Teologimik ilinniagaqartoq Helga Rosing Nathanielsen, Ilisimatusarfimmi aqutsisunut ilinniartut sinnerlugit aamma ilaasortaasoq naapinnissartik pillugu ima nassuiaavoq:
- Ilisimatusarneq toqqammaviunngippat Ilimmarfiup/Ilisimatusarfiup ingerlanerani, taava nunaqanit allaninngaanniit aqutsisut immaqaluunniit ilisimatusarfiit allat, assersuutigalugu Tromsø imaluunniit Danmarkimi universitetit assigiinngitsut eqqarsalissapput ilinniarnerput ilisimatusarfimmik - universiteti una – tunngaveqanngilaq, taava ilinniartuusugut ingerlariaqqinniarutta akornutissaasut amerlasuut naapissinnaassagigut ilimagivara.
Helga Rosing Nathanielsen ukiut pingajussaa teologimik ilinnigaqartuuvoq aasarulu bacheloritut naammassissalluni, nunanilu allani kandidat-itut ilinniarnini nangissallugu pilersaarutigaa.
Ilinnut suna aporfigisinnaagami? Aperaarput.
- Uannut aporfiusinnaasut annerpaartaat tassaavoq nunani allani atuaqqinniassaguma pinngitsoornani apeqquserneqartussaassammat tunuliaqutara.
- Ilisimatusarfiup ilisimatusarneq tunngaviginngippagu taava apeqqusernassaaq sooq ilisimatusarfivimmik tunngaveqaanngitsuminngaanneernerpa?
Helga Rosing Nathanielsenip oqaatigaa aqagu Ilisimatusarfimmi ilinniartut naapeqatigiissamaalersut.
- Aqagu tallimanngornermi nalunaaqutaq sisamanut Ilisimatusarfimmi ilinniartut naapittussaavugut, oqallisigissallugu qanoq iliuuseqarnissarput, pissuseq akuerineqarsinnaanngimmat.
Helga Rosing Nathanielsenip inatsisartunut saaffiginnittumik allakkiornissartik ilimagaa. Allakkiaq taanna inatsisissap pingajussaaniinnginnerani piumasaqaatit allanngortinneqannginnissaannik kaammattuutinik ilaatigut imaqassaaq.
Ilisimatusarsimasut tassaapput, tunngaviusumik ukiuni pingasuni bachelorinngorniareerlutik aamma ukiuni marlunni kandidatinngorniareerlutik, kingorna namminersuutigalugu ukiuni pingasuni akuerisaasumik ilisimatusarsimasut, tassa PHD-mik suliaqarsimasut.
