Ilisimatusarfimmi ilinnialersut 180-iupput

Ilisimatusarfinni ilinniarneqarsinnaasut nalinginnaasut akornanni amerlanerpaanit aallartiffiusoq tassaavoq, Oqaasilerinermik, Atuakkialerinermik Tusagassiuutilerinermillu Ilisimatusarfik. Tarnip pissusaanik perorsaanermut sammititamik ilinniartitseriaaseqarneq pillugu ilinniarnermi ilinniagartuutut ilinniartitaaneq allagartartaarfiusoq aamma amerlasuunit pilerigineqarpoq. Atuarfinnili ilinniartitsisut qinnuteqarsimasut affangajaat taamaallaat ilinniartussatut tiguneqarput, tassalu 23-it. Tamanna pingaartumik patsiseqarpoq kommunit ilinniartitsisullu kattuffiata IMAK-ip akornanni isumaqatigiissummi amerlassusiliinerup killinga ukioq manna tikinneqarmat.

Taakku saniatigut ilinniarfissuarmi ilinniartut 47-t, inuussutissarsiuteqarnermi aningaasaqarnermik ilinniartut, Ilisimatusarfiup aningaasaqarnikkut aqutsinermik naatsorsuuserinermillu, aqutsinermik aaqqissuussaanermillu ilinniartitsissutaani nutaanerpaami ukiup aappassaartut 30-t aallartipput. Oqaasilerinermik, Atuakkialerinermik Tusagassiuutilerinermillu Ilisimatusarfimmi 19-it aallartipput, peqqissaanermik ilisimatusarfimmi aqqanillit, inuiaat piorsarsimassusaasalu oqaluttuarisaanerannik ilisimatusarfimmi aqqanillit, tusagassiornermik ilisimatusarfimmi arfinillit, inunnik isumaginnittunngorniarnermik ilisimatusarfimmi arfinillit, ingerlatsinermik ilisimatusarfimmi arfinillit aamma upperisarsiornermik ilisimatusarfimmi pingasut.