Ilisimatusarfimmi ilinniagartuut aqagu soraarummiissapput

Ilisimatusarfik atuaqatigiinnik marlunnik aningaasarsiornikkut niuernikkullu ilinniagartuunik, HD-mik immikkoortuata aappaanik ingerlataqartunik aqagu soraarummeersitsissaaq. Tamarmik angusippata, Nunarput niuernermik aningaasarsiornermillu ilinniagartuunik 13-inik nutaanik pisuunnguallassaaq.

Allattoq Gedion Storch

juunip 16-at 2011 12:06

Aalborgimi Universiteti suleqatigalugu Niuernermillu Ilinniarfik Nuummiittoq tapersersuisoralugu ilinniartitsineq aaqqissuunneqarpoq.

Ukiamut HD-mik ilinniartitaaneq Ilisimatusarfimmiit neqeroorutigineqaqqissaaq. ilinniartitsissutini Aaqqissuussaanermut Aqutsinermullu atuaqatigiit ataatsit aallartinnissaat maannakkorpiaq naatsorsuutigineqarpoq, taamaattorli Naatsorsuuserinermut Aningaasaqarnermullu Aqutsinermut qinnuteqartut suli naammatsissimanngillat. Qinnuteqarfissamulli killissarititaasoq juunip 27-ata tungaanut sivitsorneqarpoq - taamaalilluni sammiviit marluk ilinniartitsissutigineqarnissaat ilisimatusarfimmiit suli neriuutigineqarpoq.

Ilinniartitaaneq piffissap ilaanut ilinniartitaanertut aaqqissuussaavoq, nalinginnaasumik suliffiup saniatigut ilinniartitsissutigineqartarluni. Ilinniartitaaneq ukiumi ataatsimi sulinertut nalilerneqarpoq, ukiunilu marlunni sivisussuseqartussatut naatsorsuussaalluni.

Aningaasarsiornikkut immikkut ilisimasaqalernissaq, ilinniartitaanerup siunertaraa, taamaalilluni ilinniartoq suliffeqarfinni, suliniaqatigiiffinni pisortallu suliffeqarfiutaanni aningaasaqarniarnikkut aqutsinikkullu ajornartorsiutinik aaqqiisinnaanissamut piareersarnertut aaqqissuunneqassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.