Ilisimatusarfimmi ikiaroornartoq pillugu oqalugiartoqalersoq

Aanngajaarniutit ikiaroornartullu pillugit inatsit pillugu Ilisimatusarfimmi ataasinngorpat septembarip ulluisa 26-anni oqalugiartoqassaaq, inooqatigiit pissusaanik ilisimatusarsimasoq Helgi Gunnlaugsson, Islandip Universitetianeersoq, oqalugiartuussalluni.

Ikiaroornartumik atuinerup ilisarnaatai pillugit misissuinerni inernerit oqalugiaatigineqassapput, ikiaroornartumillu atornerluinerup politikerinit iliuuseqarfigineqartarnera aamma eqqartorneqassalluni.

Nunat ataasiakkaat, soorlu Portugal, oqalugiarnermi eqqartorneqassapput. Ikiaroornartoq Portugalimi 2001-imi inerteqqutaajunnaarsinneqarpoq, ikiaroornartullu Cannabisip nunani allani, soorlu Uruguayimi USA-milu nunap immikkoortuisa ilaanni inerteqqutaajunnaarsinneqarnera eqqartorneqassalluni.

Aanngajaarniutit ikiaroornartullu pillugit inatsit, Ilisimatusarfimmi ataasinngorpat unnukkut nalunaaqutaq arfineq-pingasunut qiteqquppat oqalugiaatigineqassapput, oqallinnermullu kingorna aamma peqataasoqarsinnaassalluni.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl