Ilisimatusarfik oktobarimi rektorertaassaaq
Ilisimatusarfimmi siulersuisut Nuummi Ilimmarfimmi ulluni 28. – 29. juuni 2008 aappassaanik ataatsimiipput.
Rektorimik atorfinitsitsinissamut tunngatillugu siulersuisut pilersaarusiaq aalajangersarpaat atorfinittussarsiornermilu pingaartinniarneqarpoq rektoritut atorfiup inuiaqatigiinni qitiusumik inissisimasuunera.
Siulersuisuni ilaasortaqTove Søvndahl Pedersen oqarpoq siulersuisut qinnuteqaateqartunit nalilersuinerminni pingaartinniaraat aqutsinermik misilittagaqartuuneq, attuumassuteqartumik ilisimatusarnikkut misilittagaqarneq, nunarsuaq tamakkerlugu misilittagaqarneq kiisalu Kalaallit Nunaannut tunngatillugu ilisimasaqarneq. Naatsorsuutigineqarpoq atorfik aggustip qiteqqunnerani inuttassarsiuunneqarnissaa taavalu siulersuisut rektoritut atorfinittussaq kingusinnerpaamik ukioq manna oktobarimi toqqarsinnaassagaat.
Siulersuisut ataatsimiinnerminni Ilisimatusarfimmi siunissamut takorluukkat oqallisiginerat aallartippaat. Siulersuisut oqallinnerannut aallaaviupput Ilisimatusarfimmi institutit sinnerlugit maannakkut ingerlatat aamma siunissamut takorluukkatik pillugit sulisut saqqummiussaat. Tamatumunnga ilanngullugu siulersuisut aamma kissaatigisimavaat universitetip nunarsuaq tamakkerlugu suleqateqarnera pillugu, aamma Pinngortitaleriffik suleqatigalugu, silap pissusianik misissuiffissamik pilersitsinissamut periarfissat pillugit saqqummiussisoqarnissaa.
