Ilisimatusarfik kajumerineqaqaaq
Ilisimatusarfiup ukiaq manna atuartitsinerani ilinniartitsisut avataanit sivikinnerusumik aggersitat immikkullu ilisimasallit atorluarneqaqaat nutarterutaalluarpullu, Ilisimatusarfiup pisortaa Ole Marquardt, oqarpoq.
Avataanit ilinniartitsisussarsiortarnitsinnut sivikinnerusumillu maaniititsisarnitsinnut pissutaasut ilagaat atorfeqavillutik ilinniartitsisutta maanna 13-iusut piginnaassuseqarfigilluagaasa saniatigut pisariaqartitsilersarnerput ilinniartuvut immikkut ittunik paasisaqartikkusullugit, Marquardt oqarpoq, aamma kiinnat isummallu allat takullugit tusarlugillu nutarternarpoq. Ukiaq manna avataanit tikisitavut ullut 14-init qaammatit marluk angullugit maaniititavut 13-inngoreerput immikkullu pikkoriffigisaat assigiinngitsualuupput, soorlu upperisarsiorneq, oqaasilerineq, atuakkialerineq, tusagassiuutilerineq, kulturi, inooqatigiilerineq, aningaasarsiorneq, inatsisilerineq, tassa universitetini ingerlanneqartartut
tamaasa attuallallugit. Tikisitalli ukiaq manna amerlanersaat danskit universitetiineersuupput marlussuit USA-meerlutik, kisianni aggersitaasareersut Danmarkip saniatigut Europami nunani assigiinngitsuneersuusarput kiisalu Canadameersut USA-meersullu atugaaqaat, Marquardt nassuiaavoq.
Maannakkorpiaq Ilisimatusarfimmi tikeraartit ilagaat amerikamiu inuit oqaasiinik immikkut ilisimasalik Ilisimatusarfimmilu kalaallisut ilinniartunik nalunngisaminik ilisaritsisoq.
Ilisimatusarfik maanna 130-t missaannik ilinniartoqarpoq, avataanillu ilinniartitsisunik tikisitsinermi aningaasartuutit affaat Ilisimatusarfimmit namminermit akilerneqartarput, affaallu Danmarkimi ilisimatusarnermut aningaasaateqarfimmit aningaasaateqarfinnillu allanit akilerneqartarlutik.
