Ilisimatusarfik ilinniartitaaneq pillugu europami suleqateqalerpoq
Eramusimi suleqatigiinnermut ilaalernikkut ilinniagaqartut ilinniartitsisullu paarlaateqatigiittarneranni aamma ilisimatusarnikkut nunani allani suleqatigiissutigineqarnerani, Ilisimatusarfik tapiissutinik qinnuteqarsinnaalerpoq. Soorluttaaq europamiut ilinniagaqartut ilinniartitsisullu Nunatsinnukarlutik ilisimatusarsinnaalersut.
Allattoq Elisa Isaksen
januaarip 20-at 2010 06:11
Suleqatigiilernikkut Ilisimatusarfik pisussaaffilerneqarpoq ilinniartunut paarlaateqatigiinnermik aaqqissuussinermut ilaasunut akiliisitsisassanngitsoq.
- Eramusimi suleqatigiinnermut ilaalerneq Ilisimatusarfittut akuerineqarneruvoq, ilinniagaqartut ilinniartitsisullu paarlaateqatigiittarneranni aaqqissuussinermi, aammalu ilinniartitaanerup ilisimatusarnerullu nunani allani suleqatigiissutigineqarnerani, siulersuisut siulittaasuat Tove Søvndahl Pedersen oqarpoq.
Erasmusimik aaqqissuussineq ilinniarfiit qaffasinnerusut suleqatigiinnerannut tapiissuteqarsinnaanermut ammaassisuuvoq, Europamilu nunanit 31-nit peqataaffigineqarluni.
