Ilisimatusaatit siammasittorujussuussapput

Nunatsinni silap pissusaata allanngoriartorneranik misissuinerit siunissami sukumiisorujussuussapput. Taamaattumik Pinngortitaleriffiup illutaasa ilaani Silap Pissusaa Pillugu Ilisimatusarfik ippassaq ammarneqartoq ukiuni tallimani tulliuttuni suliassaqaqaaq.
Allattoq Najaaraq Egede
maajip 02-at 2009 13:15

Ilisimatusarnissanut koruunit 75 millionit missaanniittut immikkoortinneqareerput. Pinngortitalerineq, inuiaqatigiilerineq teknologilu atorlugit ilisimatusartoqassasoq, Ilisimatusarfittaami pisortaq professor Søren Rysgaard oqarpoq.

- Nunarsuaq tamaat isigalugu silap pissusaata allangoriartornerata inuiannut kingunerisassai misissorlugillu iliuusissat pillugit ilisimatusaateqassaagut. Ukiunut tallimanut tullernut millionerpassuarnik aningaasaliisoqareerpoq. Maannalu Danmarkimiinnaanngitsoq aammali nunani allani universitetit ilisimatusaatissat pillugit isumaqatigiissusiorfigilereerpavut. Neriuppugut aamma taakku aningaasaleeqataajumaartut, Kalaallit Nunaannimi ilisimatusarnissamut soqutiginnittut arlallit tutsiuttalereerput, Søren Rysgaard oqarpoq.

Pisortartaap aamma neriuutigeqaa Namminersornerullutik Oqartussanut qanimut suleqalernissartik, suliassarpassuisami ilaat politikkikkut aalajangiiffiusartussaassammata.

- Assersuutigisinnaavara imaata sikua silaannaap kissatsikkiartorneranit maanna sunnerneqartalereersoq tusartareerparput. Imaatigut angallannermut angallannernullu allanut sunniuteqassaqaaq, sermersuup aakkiartupiloornera nutaanik imeq atorlugu nukissiorfiliorsinnaanermut, allaammi umiarsualiviliornernut timmisartoqarfiliornernullu ammaassisinnaavoq. Silap pissusaata allanngornera siunissamut ungasinnerusumut pilersaarusiorluarnissamik piumasaqarfiuvoq, Søren Rysgaard oqarpoq.

Pisuussutit uumassusillit pillugit Silap pissusaa pillugu Ilisimatusarfiup Pinngortitaleriffimmi Namminersornerullutillu Oqartussani atorfillit suleqatigilluarumavai.

Kalaallit danskillu ilisimatusartut suleqatigiinnerunissaat aamma neriuutigaat.

- Issittumi ilisimatusartut amerlanerit sumi tamaaniipput, arlalissuit Danmarkimiipput ilisimatusarfinni assigiinngitsuni sulisuullutik. Ilisimasaqartut ataqatigiissaagaanerusumik siunissami suleqatigiilernissaat maanngaanniit aamma angorusoqaarput, Søren Rysgaard oqarpoq.