Gregorianerit qaammatisiutaat malillugu Ilulissani aappaagu kaperlareerpat seqineq ukiormannamit sioqqutsineroriaannarluni nuissasoq, fysikkimik ilisimatooq silasiortorlu isumaqarput,Assi: Brian Grønvold

Ilisimatooq: Taamaattumik seqineq Ilulissani nuiaarpoq

Ukiut tamaasa kaperlareeraangat seqineq ullormik ataatsimik sioqqutsilluni nuisinnaasarpoq. Tamanna gregorianerit qaammatisiutaannik ullorsiuteqarnitsinnik aallaaveqartoq, fysikkimik ilisimatuup silasiortullu oqaatigaat.

Ilulissani seqineq januaarip ulluisa 13-anni nuigaangat kaperlakkunnaartarpoq.

Ukioq mannali ulloq taanna kaperlakkunnaanngilaq.

Seqinermi januaarip ulluisa aqqaneq-aappaanni nalunaaqutaq 12.57 nuivoq, Brian Grønvoldilu ilaquttani ilisarisimasanilu seqineq nuisoq ilimaginngisaminnik nalaappaat. 

AAMMA ATUARUK Ilulissat: Seqineq - aammaarluni - piffissaq sioqqullugu nuivoq

- Tipaatsuataarlutalu horaartuuppugut. Inuit ilai qummoroortarput, Brian Grønvold KNR-imut seqernup nuinerata aqaguani oqaluttuarpoq.

Seqineq 2011-mi aamma nuiaarpoq, taamanikkummi ullunik marlunnik sioqqutsilluni januaarip aqqarnani nuimmat. Taamanikkullu nunarsuarmi tamarmi tupigusuutigineqarpoq, ilisimatuullu seqernup nuiaarneranut pissutaasinnaasorisaminnik eqqoriaapput. 

2011-mimi seqernup nuiaarneranik takusorinnittoqarsimasinnaanera eqqoriarpaat.

AAMMA ATUARUK Flere teorier om solens tidlige ankomst

Nunatsinni silasiortutut soraarneq, Leif Rasmussen, danskit aviisiannut Berlingske Tidendemut 2011-mi taama isummerpoq. Ukiorlu manna aama taama pisoqarsimasinnaasoq, fysikkimik ilisimatooq DMI-llu silasiortua, Kristian Pagh Nielsen, naliliivoq.

- Taama pisoqarluarsimasinnaavoq. Tassa seqernup qaamanera sangusimasinnaavoq. Tamanna miserratissaanngilaq, Kristian Pagh Nielsen oqarpoq.

Soorlu immiartorfik imermik imalik uertikkaanni seqernup qaamanera sangusimasoq takuneqarsinnaasarpoq.

- Leif Rasmussenillu 2011-imi oqarnera naapertorlugu seqernup qaamanera silaannarmi aamma sangusinnaasarpoq, Kristian Pagh Nielsen nassuiaavoq.

Brian Grønvoldilli peqatigisaatalu nalaataattut seqernup pisarnermit ullormik ataatsimik sioqqutsilluni sapaatiummat nuinera allamik aamma pissuteqarsinnaasoraa.

AAMMA ATUARUK Nunatsinni seqineq alutorivippaat

Gregorianerillu qaammatisiutaat tunngavilersuutigaa. Kristian Pagh Nielsenimmi oqarnera naapertorlugu gregorianerit qaammatisiutaat malillugu ukiumi ataatsimi ullut 365,2425-usartut pivisumik 365,2422-usarput.

-  Taamaattumik ukiuni pingasuni tulleriinni ullut 365-iusarput, ukiullu taakkua sisamaanni ullut 366-iusarlutik.

Tamannarpiarlu peqqutigalugu seqineq pisarnermit sioqqutsilluni nuisinnaasartoq, Kristian Pagh Nielsen nassuiaavoq.

- Ukioq mannami ullut ullormik ataatsimik ilapput. Taamaattumik seqineq pisarnermit sioqqutsilluni nueqqittarumaarpoq. Tassa imaappoq, seqineq aappaagu immaqa sioqqutsineroriaannarluni nuissaaq, Kristian Pagh Nielsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat