Ilisimatooq: Silap kissatsikkiartornera nannunut ajornartorsiutaavallaanngilaq

Nanoq toqungasoq sororpasittoq Svalbardimi nassaarineqarsimavoq, piffissamilu kingullermi Svalbardip eqqaa sikoqarpiarsimanani. Paasissutissat takku marluk tunngavigalugit tusagassiortup tuluup inernilerpaa, silap kissatsiartornera nannut toqqutigisalersimagaat.

Taamaaqqissaanngilarli, Aqqalu Rosing-Asvid Pinngortitaleriffimmeersoq oqarpoq.

- Nannup pineqartup perlerluni toqusimanissaa ilumoorsoraara, aamma sikoqassutsimik peqquteqarsinnaavoq. Kisianni imaanngilaq nannut nunarsuarmi tamarmik sikoqassusaa pissutigalugu toqoralersut.

Nannup perlerluni Svalbardimi toqusimanera, nannut toqqutigisartagaasa nalinginnaanerpaartaraat, ilisimatooq oqarpoq. Taanna 90-kkunni nannut perlerlutik toqusimasut arlallit naammattoorsimavai. Silalli kissatsiartorneranik peqquteqanngilaq.

- Taamani issittupilussuuvoq, allaat Kitaani aatsaat taama issitsigineranik uttoortaasoqarluni. Nannup perlerluni toqunera silap kissatsikkiartorneranut attuumassuteqartariaqanngilaq, ilisimatooq oqarpoq.

Assersuutigalugu Canadap avannaarsuani ilisimatusarnerit takutippaat siku aasaanerani aakkiartunngitsoorpat, taava puisinit alluliorfigissallugu orniginarpallaarunnaartartoq, puisillumi nannut nerisartagaasa pingaarnersaraat.

Nannunik ilisimatusartoq nassuiaavoq, nunatsinni nanoqassutsimut tunngatillugu ulorianartorsiortoqanngitsoq. Ukiunummi qulikkuutaanut kingullernut naleqqiutissagaanni, puisit Issittumiittut maanna marloriaatinngorsimapput.

Madeleine Redfernip, Canadami Iqalunni borgmesteriusimasup Twitterimi oqallinnermut aamma akuliuppoq.

- Imaata sikuunnginneratigut nanuerunnissaanik oqalunneq ingasattajaarneruvoq, pissusiviusut equngalluinnartumik saqqummiunneqarput tusagassiortullu suliaanik ajorluinnartunik tunngaveqarlutik.

Nannunik ilisimatusartup eqqaasitsissutigaa nunani nanoqassutsimut sunniuteqarnerpaasoq tassaasoq nannut piniagaanerat.

- Nannut ilanngarnagit piniarunnaartuugutsigit, taava toqqutigisartagaasa nalinginnaanerpaartarissavaa perlerneq - aamma sila kiakkaluarpat nilleraluarpalluunniit, Aqqalu Rosing-Asvid, Pinngortitaleriffimmi ilisimatooq oqarpoq.

Taanna naapertorlugu sikuunnginnera nannunut Svaldbardimittunut Hudsonillu kangerliumarnganiittunut ajornartorsiutaavoq.