Ilisimatooq: Sermersooq ilaasortaajunnaassappat Kanukokamut kinguneqarnerlussaaq

- Una pisoq akerliunermik takutitsineruvoq. Arlaannik assorsuaq naammaginngisaqarput, taamaammat nipitunerpaamik akerliunerminnik takutitsipput. Kisianni kattuffimmiiginnarnissamik kingusinnerusukkut aalajangissappata tupassanngilanga, Roger Buch oqarpoq.

Aamma atuaruk Kommunalbestyrelsimut ilaasortaq: - Kanukoka malunnaataaruppoq

IA Demokraatinit taperserneqarluni siunnersuuteqarpoq, kommuni Kanukokamit ilaasortaajunaassasoq.

Kommunili ilaasortaajunaassappat tamanna Kanukokamut kinguneqarnerlussasoq, ilisimatooq naliliivoq.

- Kommunerujussuaq pingaaruteqaqisorlu, kommunit ikittunnguit peqatigiiffiannit anininiarpoq. Taamaaliorneratalu kattuffiup Naalakkersuisunut isumaqatigiinniartarnera assorsuaq sanngiillisissavaa, kommunit pillugit ilisimatooq oqarpoq. 

Naalakkersuisunut pisarissersuutaassasoq

Aammali ilaasortap ataatsip ilaasortaajunaarnera Naalakkersuisunut pisarissersuutaassasoq, Roger Buchip oqaatigaa.

- Kommunit ataasiakkaat tamaasa immikkut isumaqatiginiassallugit, imaluunniit kommuni ataaseq taavalu kommunit  allat kattussimasut isumaqatiginiassallugit Naalakkerusisunut pisariunerussaaq. Aammami naalakkersuisunit isigalugu kattuffeqarnermi siunertaavoq, illua tungerisamik ataatsimik isumaqatigiinniaqateqaraanni, taava kommunit tamaasa isumaqatigiissuteqarfigalugit, Kommunit pillugit ilisimatooq, Roger Buch, oqarpoq.