Ilisimatooq: Royal Greenland imaannaanngitsorsiorpoq
Naatsorsuutit malillugit Royal Greenland 131 mio. koruuninik amigartooruteqarpoq.
- Oqaannartariaqarpoq Royal Greenland imaannaanngitsunik atugaqartoq, massakkorpiaq qanoq iliuuseqartoqartariaqarpoq, tamanna nalunanngivippoq, taamaattumillu nassuiaatit aallartinneqarnerat takullugu nuannerluni, Lise Lyck oqarpoq.
Illit ajornartorsiutini suut annertunersaasoraagit?
- Ajornartorsiutini annertunersaapput isertitat nakkariarnerat aammalu ingerlatsinermi nalinginnaasumi toqqaannartumik amigartooruteqarneq. Tamatumanilu ikittuunngitsunik amigartooruteqartoqarpoq 66 mio. koruuninik, tamannalu Royal Greenlandip sulinerani qitiusutut ippoq. Iluarsiissutissaq aallartinneqartussaq tassaavoq aningaasartuutit annertussusiisa aqunneqarnissaat.
Ukioq kingulleq ingerlatsineq qiviaraanni, taava Royal Greenlandimi naatsorsuutit inernerat ataasiinnarmik sammiveqarput, tassalu ammut
- Aap, taamatut oqartoqarsinnaavoq, takussutissarmi qiimmaallaatissaanngivippoq, tassami
pitsaanerusumik ingerlasoqarneranik oqarsinnaassagaanni ukiut qassialuit kingumut qiviartariaqarpoq, taamaattumik suliffeqarfiup aaqqissuuteqqinneqarnissaanik pisariaqartitsisoqangaatsiarunarpoq.
Suut tikkuarsinnaavigit soorlu aningaasartuutit appartinniarneqassappata?
- Naatsorsuutit taama ajortigisumik isikkoqartillugit taava isumaga naapertorlugu naatsorsuuteqarfiit tamarmik misissuataarneqartariaqarput, imaanngitsoq ukuninnga pisissaasi ima akeqarput, kisianni naatsorsuutit tamarmik misissorneqartariaqarput, tamannalumi patajaallisaanissamut pilersaarummi isumagineqarsimagunarpoq, taamatut tassa Copenhagen Business Schoolimi aningaasaqarnermut immikkut ilisimasalik Lise Lyck.
