Ilisimatooq: Qipoqqaat arfernik takornariartitsiffiusanngitsuni piniarneqartalerlit

Arfanniarneq pillugu Ataatsimiititaliarsuaq Marokkumi juunimi ukiormoortumik ataatsimiimmat, Nunatta ukiuni arlalinni kissaataa piviusunngorpoq, qulingiluanik qipoqqartassinneqarami.

Taava maanna apeqqutalerpoq, qipoqqaat imartani aalajangersimasuni pisarigaanni ajunnginnerussannginersoq.Tassami qipoqqaat neriniarfinnaaminnut ukiut tamaasa uteqqiattarput.

- Qipoqqaat pissusilersortarneranni misissuinitsinni paasivarput, Kitaata imartaata ilarujussuaniittartut, nerisassarsiortillutillu sukkasuumik avannarpartarlutillu kujavarpartut, Lars Witting allappoq.

Qipoqqaat Nuup Kangerluaniittut qassit, ukiut siuliini aamma tamaniissimanersut, Pinngortitaleriffiup maanna misissuleruttorpaa.

- Misissuinermit inerrnerugallartut takutippaat, arferit, Nuup Kangerluani 2007-mi assilineqarsimasut, 40 procentii 2008-mi aamma tamaani assilineqarsimasut, ilisimatooq allappoq.

Taanna nangilluni allappoq, qipoqqaat amerlanngitsut Nuup Kangerlua neriniarfigisaraat.

- Kalaallit Nunaata qipoqqarnik piniagaqarnissaq arfernullu takornariartitsisarnissaq kissaatigiguniuk, taava immaqa pitsaanerussaaq, arfernut takornariartitsiffiusanngitsuni arfanniartoqartarpat, Lars Witting naliliivoq.

Naak arfanniartarneq arfernut takornariartitsinermut qanoq sunniuteqassanersoq sukumiisumik ilisimasaqarfigineqanngikkaluartoq, taakkua imartani akuleriisinnissaasa takornariartitsisarnermut ajoqutaasinaanera Lars Wittingip miserratiginngilaa.

Aamma arfernik takornariartitsisartut Nuup Kangerluani qipoqqarnik piniartarnissamut akerliullutik siunnersuuteqarput arfernut takornariarfiusartut tamarmik eqqissimatinneqalernissaanut.

- Qularinngilluinnarparput Nuup Kangerluani qipoqqarmik ataatsimik pisaqartoqarpat, tamanna inuussutissarsiutitsinnut kinguneqarnerlussasoq, taama arfernernik takornariartitsisartut tallimat assigiinngitsut Sermitsiami atuartartutut allapput.

Qipoqqarnik kisitsinerit takutippaat, taakkua kinguaassiornikkut ukiumut 9 procentimik amerlisartut, kitaalu 2007-mi 9000-it missaannik qiporaqartoq.