Ilisimatooq periarfeerussaq takkuteriasaarpoq
Paasiniaasarfimmi CIA-meersut taassuma periarfeerukkaluarneranut pisuunersut Iranimiulluunniit namminneq piliarineraat maanna apeqqutaaginnalerpoq.
Atomfysikeri inuusuttoq Iranimiuusoq Saudi Arabiamut illernartumukartilluni periarfeerunneqarpoq. Iranip tamatuma kinguninngua Amerikamiut aallarussisuunerarlugit pisuutippai Iranip atomip nukinga atorlugu suliaqarnerannut tunngasumik paasissutissanik pissarsiffiginiarsarinerarlugu.
Periarfeerunneqaraluartup atomip nukinganik ilisimatusartuugami Iranip suliaqarnera pillugu paasissutissarpassuarnik Amerikamiut pissarsiarerusoqisaannik ilisimasaqarpoq.
Amerikamiut pisuunnginnerarput Iranimiorlu nammineerluinnarluni paasissutissanik CIA-mut tunniussisarsimanerarlugu.
Atomfysikeri pillugu internettimi qaammatini kingullerni paatsiveerussaataasunik takkuttoqartarpoq ilai nammineq ilumoornerarpai ilaalu salluliuutaanerarlugit.
Ataasinngormat Pakistanip Washingtonimi aallartitaqarfianut iseriasaarpoq. Tassaniitilluni angerlarumarluni noqqaavoq qanorlu ililluni aallarunneqarsimanini oqaluttuaralugu.
- Sumiinneranik isertukkaminnukaappaannga tassanilu kapillunnga iteramalu sakkutuut timmisartorsuanniippunga, atomfysikeri oqarpoq. Iranimiit qimaasuunerarluni Amerikamiut tusagassiorfiinut sallulioqqulluni CIA-mit piumaffigineqarsimagaluarpoq akilerniarneqaraluarlunilu.
- 1 million dollarinit aallartippoq allaallu 10 mio.-it eqqaasarlugit. Namminerli aningaasat pingaartissimanagit oqarsimalluni oqaluttuarpoq.
Taamaalillunilu paatsiveerunnersuaqarpoq. CIA Amerikamiullu taamaattoqanngitsoq oqarput aviisillu maanna isumaqalerput atomfysikeri angerlarniassammat ilaqutai Iranimi oqartussaasunit qunusaarneqarsimassasut.
Maanna tassa angerlamut ingerlavoq. Amerikamiunut oqaluttuuttarsimanerai taamaassappallu qanoq oqaluttuartarsimanersoq paasissutissallu suut tunniussuussimanerai apeqqutaaginnalerpoq.
Iranip atomip nukinga atorlugu suliai pillugit Amerikamiut paasissutissanik atorsinnaasaminnik pissarsisimallutik unnuk manna nalunaarput.
