Ilisimatooq: PAARISA ajunngitsumik iliorpoq
PAARISA-p imminortarneq pitsaaliorniarlugu periusissaa ukiuni pingasuni ingerlanneqartussaq, ukiut marluk matuma siornatigut aallartinneqarpoq.
Ilisimatusarfimmi phd-nngorniap, Nunavummiup Jack Hicks-ip, periusissaq nalilersoqqammerpaa, oqaasiilu malissagaanni Kalaallit Nunaat ajunngitsumik iliorpoq.
- Imminortarneq pitsaaliorniarlugu Namminersornerullutik Oqartussat suliniuteqarnerat ajunngitsumik ingerlavoq. Naalagaaffiit Peqatigiit peqqinnissakkut suleqatigiiffiata, WHO-p, innersuussutai tunngavigineqarput, periuserlu atorneqartoq nunani allani iluatsitsiffiusimavoq, Jack Hicks oqarpoq, nangillunilu:
- Sulili ilisimatuussutsikkut sulisoqartariaqarpoq. Inuiaqatigiit iluanni assigiinngitsutigut suleqatigiittoqartariaqarpoq, ataatsimulli isigalugu Namminersornerullutik Oqartussat ajunngitsumik iliorput, Canadamiu Jack Hicks oqarpoq.
Ukiut qulikkaat arlallit ingerlanerini pisimasut aallaavigineqarput, imaaliallaarnarlugillu allanngortinneqarsinnaanngitsut ilisimatusartoq oqarpoq.
- Ataatsimut isigalugu nunatsinni imminortartut ukiuni kingullerni amerliartornatillu ikiliartorsimanngillat, maluginiagassarlu tassaavoq arnat imminortartut amerliartormata, Jack Hicks oqarpoq.
Ilisimatuunngorniaq Jack Hicks nunarput pillugu neriulluarpoq, oqaatigaluguli suliaq oqitsuinnaanavianngitsoq.
- Imminortarnerit unitsissinnaanngilagut, suliarli pimoorullugu ingerlakkutsigu imminortarnerit ikilisarsinnaassavagut, Jack Hicks naggasiivoq.