Ilisimatooq: Nunasianngornermi kalaallit uukapaatitaanikuunngillat

Kalaallit Nunaata 1953-imi Danmarkimut ilanngutitaanera pipallataananilu uukapaatitsinerunngilaq, taama danskit aviisisa ilaanni Politikenimi allaaserinnittoqarpoq.

Hans Enoksenip kissaateqarnera naapertorlugu nutaamik Nalunaarusiami, nunatta nunasiaataarnerminit naalagaaffeqatigiinnermut ilaalerneranut tunuliaqutaasut misissorneqarsimapput.

Nunasiaataaneq pillugu oqallinneq kissaammissutigineqartuartarpoq, soorluttaaq Lars-Emil Johansen 2004-mi aviisikkut allaatigisamini ima allattoq:

-Danskit inatsisaannut tunngaviusumut taamani kalaallit sianigisaqanngikkallarmata Danmarkip FN-illu kalaallit salluliorfigisimavaat uukapaatillugit nipangiussiffigalugillu.

Taamatulli isumaqarneq, Danskit, nunat tamalaat pillugit ilisimatusarnerannut atatillugu nalunaarusiaat, naapertussagaanni eqqunngilaq.

-Aviisini allaniluunniit paasissutissaasinnaasuni nassaarsinnaanngilagut taamanikkut kalaallit allatut isumaqarsinnaanerannik allaaserinnittunik. Paasissutissani nassaarisinnaasatsinni tamani, kalaallit Danmarkimut atarusullutik kissaateqarsimapput.

1953-imeersunit paasissutissat naapertorlugit kalaallit namminersorusullutik, qinersisitserusullutilluunniit kissaateqarsimanngillat, nalunaarusiamik suliarinnittoq ilisimatooq Erik Beukel aviisimi Politikenimi issuarneqarpoq.

Erik Beukel oqarportaaq nalunaarusiami kamannermik pilersitsinissaa ilisimaarilluinnarini.