Assi: Ilisimatusarfik / Emil Stach

Ilisimatooq Naalakkersuisut coronamut tunngatillugu paasissutissiineranut: Inuit paatsuungapput

Naalakkersuisut corona pillugu tusagassiuutinut aggersaagaangamik kisitsisit ulluliinerillu pillugit paasissutissat arlaqartarput. Tamanna Sakiup Biiniallu malinnaasinnaaneranut ajornakusoortitsisinnaasoq, Signe Ravn Højgaard Ilisimatusarfimmeersoq isumaqarpoq.

Siullermik nuna tamakkerlugu coronapas-eqarnissaq piumasaqaataavoq. 

Malittarisassaq taanna pingasunngornerup unnuaagaa atorunnaarsinneqarpoq, atorunnaarsinneqaannartorlu aggustip 24-ata tungaanut sivitsorneqarpoq - tamannali Naalakkersuisut pisortatigoortumik nalunaarutiginngitsoorpaat. 

Taamatuttaaq Aasianni misissuisarfimmut tunngasoq –  Aasianni misissuisarfeqalersoq, naalakkersuisup, Kirsten Fenckerip tusagassiortunik katersortitsinermi marloriarluni oqaatigaa, uffalu pilersinneqanngitsoq. Tamanna eqqunngitsumik ilisimatitsineruvoq.

Taamatuttaaq Naalakkersuisut corona pillugu tusagassiortunik katersortitsigaangamik kisitsisit ulluliinerillu pillugit paasissutissat amerlasoorujussuusarput. Amerlavallaangajattarlutik.

Tamanna inuit naalakkersuisunut tatiginnikkunnaarnerannik pilersitsisinnaasoq, Ilisimatusarfimmi tusagassiortunngornianut, Kalaallit Nunaannilu tusagassiuutit pillugit ilisimatooq, Signe Ravn Højgaard, isumaqarpoq. 

- Killilersuutit suut atuutsinneqarnersut innuttaasunut ataasiakkaanut paatsuunganarsinnaallutillu ersernerlussinnaapput, taanna oqarpoq. 

- Nalunaarutit inuit inuunerannut pingaaruteqartorujussuupput. Suut atuunnersut ersarissumik oqaatigineqanngippata malinnaaniarneq ajornarsinnaassaaq, naggataanilu paasisaqanngilluinartoqarsinnaallunilu uppernassusermik apeqqusiisoqarsinnaavoq. Eqqarsartoqarsinnaavoq: Suliatik nalunngilaat?, taanna oqarpoq.

Nunatsinni tamanut suut atuutsinneqassanersut pisortanit paasissutissiissutigineqanngippata suna tamarmi ersernerlulissaaq.

- Innuttaasut nalinginnaasut malittarisassat suut imminnut atuunnersut paasiniarlugit nalunaarutinik ataasiakkaanik atuaqarnissaat piviusorsiornerunngilaq, Signe Ravn Højgaard oqarpoq. 

Tusagassiortunik katersortitsinermi paasissutissaqarpallaartoq

Sapaatip akunnerani matumani ajortoqarpoq, tassami KNR-ip tusagassiortunik katersortitsinermi killilersuutit atuukkunnaalersut apeqqutigai, taakkulu paasissutissiissutigineqaratik sivitsorneqarpoq. Kirsten Fenckerip apeqqut naatsumik akissuteqarfigalugu tusagassiuutinut nalunaaruteqarnissaq innersuussutigaa "ullup ingerlanerani paasissutissiissutigineqarumaarpoq"-mik oqaasertalerlugu, - paasissutissiisoqanngilarli. 

Tamanna Kirsten Fenckerip atorfilittat ulapippallaarujussuarneranik tunngavilerpaa. Allatut oqaatigalugu nunatsinni innuttaasunut malittarisassat tamanut atuuttut pillugit ilisimatitsinngitsoorput. 

- Naalakkersuisut neriorsuutiminnik eqquutitsinngikkaangata, suut malinneqassanersut innuttaasunut paasiuminaallisarput. Ilaatigullu taamaattoqartarsimavoq, Signe Ravn Højgaard oqarpoq. 

Naalakkersuisummi qanoq iliorsinnaappat? 

- Tusagassiorfiit malittarisassat pillugit ataatsimoortumik paasissutissiinerat iluaqutaasinnaavoq: Malittarisassat uku maanna atuupput. Aasianni najugaqaruit uku atuupput. Naalakkersuisut malittarisassat tamarmik aalajangersimasumi katersorsinnaavaat, ilisimatooq oqarpoq.

Taamaakkaluartorli paasititsinissamut suliaq annertoorujussuaq ajornartorujussuarlu Naalakkersuisunit paarineqartoq, Signe Ravn Højgaard oqarpoq – Kalaallit Nunaannimi siornatigut taamatut inissisimasoqarnikuunngilaq, tassa sapaatip akunneraluunniit qaangiutinngitsoq coronamut killiffilersuutinik nutaanik peqalertarpoq, nunarsuarmilu tuniluunneq uniffeqarani ineriartortuarluni. 

- Tamaakkaluartoq inuit inuunerannut pisariaqanngitsumik akuliunnerusariaqanngillat. Tamannalu ajunngeqaaq – tamannalu Inuit pisinnaatitaaffii pillugit siunnersuisoqatigiinnit nersualaarneqarpoq. Akornutaa unaaginnarpoq innuttaasut paasissutissanik ilisimannilernissaa ajornakusoorsinnaavoq, Signe Ravn Højgaard oqarpoq.

Nunatsinni coronavirusi pillugu
killiffik

Uninngasut 0  
Toqusut 21  
Siullermik kapitissimasut 73%  
Aappassaa kapitissimasut 68%  
corona.nun.gl-imi kisitsit takukkit  
  Nutarterneqarpoq: 
  Apriilip 1-aat 14:00

corona_model_001.png

Nunatsinni coronavirusi pillugu

Coronavirusimik tunillatsinissaq pinaveersaaruk