Ilisimatooq: Kalaallit inuiattut ikinnerussutilittut nalilertariaqarput

Nunatsinni Amnesty Internationalip isummernerata kingorna, Kalaallit Danmarkimiittut inuiattut ikinnerussutilittut Danmarkip akuerinnittariaqarnera assortorneqarsinnaanngitsoq, inuiaat pisinnaatitaaffii pillugit ilisimatooq oqarpoq.
marsip 20-at 2011 12:03

Kalaallit Danmarkimiittut inuiattut ikinnerussutilittut Danmarkip akuerinnikkusunnginnera Amnesty Internationalip Nunatsinni immikkoortortaani siulittaasup Roland Thomsenip nalileqqeqqumagu, inuiaat pisinnaatitaaffii pillugit ilisimatuup Islandimi Akureyrip ilisimatusarfianeersup, Gudmundur Alfredssonip taperserpaa.

- Aap, piumasaqaateqartut ilumoorsoraakka. Namminersulernermulluunniit inatsit suli pilersinneqanngikkallarmat kalaallit sivisuumik Danmarkimi najugaqarsimasut inuiattut ikinnerussutilittut naatsorsuutigineqarsimasinnaagaluarput. Kalaallilli inuiattut Danmarkip akuerimmagit tamanna apeqquserneqarsinnaajunnaavissorpoq. Taamaammat; aap, Amnestymeersut ilumoorput.

Naalagaaffinni inuiaat ikinnerussuteqartut kulturimikkut oqaatsimikkullu pisinnaatitaaffiisa illersornissaat europamiut 1997-imi isumaqatigiissutigimmassuk Danmarki atsioqataalluni erseqqissaavoq, Jyllandip kujataani tyskit kisimik inuiattut ikinnerussutilittut naatsorsuutigineqassasut.

- Naalagaaffippassuit - tassa Danmarkiinnaanngitsup - inuiaat ikinnerussutillit taamatut naatsorsuutigilernaveersaartarpaat. Tamanna nutaajunngilaq, Giudmundur Alfredsson oqarpoq.

Kalaallip nappaatillip ukiuni arfineq marlunni Danmarkimiissimasup pisinnaatitaaffiiagaanerata kingorna, Danmarkimi kalaallimik palaseqarnerup nakorsiartullu nutserisoqartariaqarnerannut aningaasartuutit naalagaaffimmiit akilerneqartariaqannginnersut Amnestymiit apeqqutigineqarpoq. Taamatut pisoqartillugu naalagaaffiit akornanni isumaqatigiissutit iluaqutaasinnaasut, Gudmundur Alfredsson naliliivoq.

- Inuiaat ikinnerussutillit pisinnatitaaffii naapertorlugit nakorsiarnermi nutserisoqartinneqatussaapput. Upperisamulli attuumassutillinnut pisinnaatitaaffiit nunat tamat isumaqatigiissutaanni erseqqarissumik allassimanngikkaluartut apeqqut susassaqartunut nalilertinniarneqarsinaavoq, Alfredsson oqarpoq.

Taanna aamma isumaqarpoq, kalaallit Danmarkimi najugallit inuiattut ikinnerussutilittut akuerineqarpata - soorlu kalaallit oqaasiinik ilinniartitaaneq, nutserisoqartitaasinnaaneq kulturimullu attuumassuteqartunut taperneqarsinnaaneq - anguneqarsinnaassangaluartut.

- Kalaallit Danmarkimi najugallit immikkut pisinnaatitaaffilerneqarsinnaanerat akornutissaqanngilaq, tassa kalaallinut Kalaallit Nunaanni najugalinnut atuutsinneqanngikkaluanik.

Kalaaleq Kalaallit Nunaanni najugaqartoq nunami namminersortumi najugaqarput, taamaammat kalaallit Danmarkimi najugallit kisimik inuiattut ikinnerussutilittut pisinnaatitaaffeqalersinnaapput, Alfredsson oqarpoq.

Danmarkip isumaqatigiissutinik qanoq naapertuisariaqarnini tunaartaralugu kalaallit inuiattut ikinerussutilittut akuerinnikkusunnginnera Namminnersornerunerup nalaani naalakkersuisuusut maannakkullu naalakkersuisut akueriinnarnikuuaat. Tamanna Gudmundur Alfredssonip nassuiaatissaqartinngilaa, erseqqissarpaali kalaallit Danmarkimi najugallit inuiattut ikinnerussutilittut naatsorsuutigineqalerunik ajornerusunik pisinnaatitaaffeqalernavianngitsut.