Ilisimatooq: Kalaallit ikippallaaramik namminersulivissinnaanngillat
Naalagaaffeeqqat inuttussutsimikkut allanut nallersuussinnaanngitsut nunarsuarmi aningaasarsiornermi iluatsinneq ajorput, taama aningaasarsiornermut professori Anne Silbert, Birkbeck Universitetimi Londonimi sulisoq oqarpoq. Islandip aningaasaqarnermigut ajalusoorluinnarnera takussutissiilluartutut saqqummiukkusuppaa. Namminermi Islandip qitiusumik aningaaserivissuata Island Centralbankip politikkikkut komiteani aallartitatut suleqataasimavoq.
Nittartagaq aqqutigalugu allaaserisaa inuiaqatigiinnik ilisimatusarnermut tunngasunik atuagassiami Vox-imi saqqummiunneqaqqammerpoq. Allaaserisami tassani Kalaallit Nunaat nunatut namminiilivikkaluaruni Islandip aningaasaqarnikkut ajutoorneratulli periaannaanerarpaa, Kalalalit Nunaat immikkut naalagaaffinngornissaminut innuttakippallaartoq oqaatigalugu.
- Aap, Kalaallit Nunaata innuttai Islandip innuttaanut naleqqiullutik tallimararterutaannaapput, taamaammat Kalaallit Nunaat imaaliallaannaq inuttuseriarsinnaanngilaq aammalu inuit allaffissornikkut naalagaaffimmik ingerlatsisinnaasut pisariaqartitani imaaliallaannaq pissarsiarisinnaassanagit, Anne Silbert oqarpoq.
Naalagaaffeeqqat suliassanut assigiinngitsunut tunngatillugu politikkikkut ingerlatsinermik ilisimasaqarluartunik peqannginnertik aamma sanngeequtigisaraat oqaatigaa.
Taamaammat Kalaallit Nunaat siunnersorussuppara Danmarkimik naalagaaffeqateqaannarnissaanik, tamanna nunatut illersorneqaannarnissaanut qulakkeerisussaammat, Anne Silbert kaammattuivoq.
Island 2009-mi ukiortaami 325.000-inik inoqartoq, Kalaallit Nunarput 56.194-inik inoqarpoq. Anne Silbertip allaaserisaa nittartakkatsinnut iserluni atuarneqarsinnaavoq. .
