Ilisimatooq: Issittoq pissaaneqarnerpaanngussaaq

Ilisimatooq ateqarpoq Laurence Smith. Atuakkiamini The World in 2050-imi allaaseraa, nunarsuatta kissakkiartornerata kinguneranik nunani issittuni allannguutissat pitsaaqutaat.

Asiap Kangiani ukiuni kingullerni 20-ni pissutsit eqqarsaatigalugit, aammalu allanngoriartorsimaneq eqqarsaatigalugu, nunat issittut siunissaat atuakkiamini taakkununnga nallersuuppai.

Nunat issittut, Laurence Smith allappoq, nunarsuatta aningaasaqarnera allanngortilluinnassavaat, tassami tamanna siunissami pisoorsuanngortussaavoq, pisuussutsit uumaatsut aammalu uumassusillit tikikkuminarninngussammata.

Angallaviit nutaat pinngorassapput, takornariat amerlanerit tikittalissapput aammalu nunaateqarneq siuariartussaaq, tamannarpiarlu pingaaruteqarpoq, tassami nunarsuatsinni inuit amerliartuinnavikkamik.

Nunani issittuni qangaaniilli najugallit eqqissisimasumik sorsuuffiunatillu inuuneqarnerat nunarsuatsinnut tamanut sunniuteqassaaq, akerleriittoqartillugu sorsuunneq qinernagu oqaloqatigiinneq qinerneqartalerpat.

Tamakkorpassuit pissutigalugit issittup inuii nunarsuatsinni pissaaneqarnerpaanngussapput, Laurence Smith ilaatigut taama siulittuivoq.

Nunat avannarliit nutaat, atuakkiamini Laurence Smithip taama nunat issittoqarfinniittut taagamigit, nunasiniartunit suliartortunit ornigarneqartussaavoq, aammalu taakku atorfissaqartinneqassaqaat.

Nunat issittoqarfinniittut arfineq pingasuusut Laurence Smithip atuakkiamini ima eqqartorpai: Sulerusussuseqartut, nukissaqarluartut, saperatik isumaqartut, soorlu uumasoq tiigeri taamaattoq.