Ilisimatooq: Island Norgep koruunianik aningaasaqalerli
Islandimiut qitiusumik aningaaserivissuat tatigineeruppoq, Matthiassonillu siunnersuutigaa, Norges Bankimut immikkoortortanngussasoq aamma Island Norgimiut aningaaserivinnut nakkutilliiviata ataaniilissasoq.
Tamanna Islandimiunut atuisartunut qanoq sunniuteqassanersoq Københavnimi Handelshøjskolimi aningaasaliisarneq pillugu ilisimatuup Jesper Ravnvedip nassuiarpaa.
Islandimiut koruuniannut tatiginnittoqarunnaavippoq. Islandimiut atuisartut inuussutissat nioqqutissallu allat akitsorujussuarnerat takoreerpaat. Islandimiullu koruuniat norskit koruuniannik taarserneqartuuppat akit taamarsuaq qaffakkiartussanngikkaluarput.
- Isumaqarpunga Islandimi aningaasarsiornikkut ilisimatuup nunat Afrikamiittut, Amerikami Qiterlermiittut Ruslandimiittullu, Islandimut assingusumik misigisaqarsimasut isumassarsiorfigisimagai, taakkumi namminneq aningaasatik atorunnaarlugit nunat allat aningaasaannik atuilersimammata, Jesper Ravnved oqarpoq.
Taanna aperineqarami siunnersuut taamaattoq Islandimiut atorsinnaassaneraat oqarpoq, taamaaliornermikkut aningaasarsiornertik aningaasallu nalikilliartornera aqussinnaalissagaluaraat, tassami massakkut nunani allamiut Islandimiut koruuniat tatigiunnaavinnikuummassuk. Tatiginnikkunnaarnerlu allanngortinniarlugu iliuuseqaqattaarnatik norskit koruuniannik aningaasaqalersinnaasut.
Jesper Ravnved aperineqarpoq tamanna isumaqatiginartinneraa.
Taanna akivoq, tamanna isumassarsiatsialattut taasinnaanagu, tassami ajornanngikkaluarpoq oqaannassalluni Islandimiut koruuniat Norgimiut koruuniannik taarserparput. Kisianni Norges Bankip ataani inissisimaniaraanni, pisariaqassaaq Norgimiut aningaasarsiornermik ingerlatsinerannut malinnittunngornissaq. Tamatumanilu Islandimi pissutsit eqqarsaatigineqarnavianngillat, Jesper Ravnved oqarpoq.
Jesper Ravnvedip ilimagineruaa, piffissaq ungasinnerusoq isigalugu Island euromik aningaasaqalerumaartoq, piffissarlu qaninnerusoq isigalugu Island nunat siuarsagassat taarsigassarsiniartarfiannit ikiorserneqarumaartoq.
