Ilisimatooq: Inuiaqatigiit tusaaniarneqassapput

Akileraartarnermut Atugarissaarnermullu ataatsimiititaliarsuup pingaarnertut siunniussariuarsimavaa, ilinniartitaaneq aammalu suliffissaqarniarneq eqqarsaatiginerullugit sunik aaqqiissutaasinnaasunik siunnersuuteqassallutik.

Ataatsimiititaliarsuup suut pingaarnertut saqqummiutissaneraat paasiniarlutigu, isummersortipparput, sivisuumik ilisimatusarsimasoq aammalu politologi, Birger Poppel. Naak taassuma aamma suut eqqartorniarneqarnersut siumut oqaatigereersinnaagikkaluarlugit, taamaattoq naatsorsuutigaa ilinniartitaaneq aamma suliffissaqarniarneq pingaarnertut eqqartorneqarumaartut:

- Inuiaqatigiinni nammaqatigiinneruneq pilersinneqassappat, soorlu taanna politikkikkut siunniunneqarsimasoq, taava eqqartorneqassaaq akissaqarnerit nammaqataanerusariaqarnerat. Taamaattoqassappallu taava akileraarusioriaatsit assigiinngitsut pilersinneqarnissaat eqqartorneqassapput, soorlu assersuutigalugu akileraarutitaqanngitsumik isertitaasartut akileraarusersorneqalernissaanut appaanerit. Aamma eqqrtorneqartussanut ilaanngitsoornavianngilaq ineqarnermi akileraarusersueriaaaseq, Birger Poppel oqarpoq.

Tassalu ineqarnermut tunngasut ataatsimiititaliarsuup saqqummiuppagit oqallinneq aallartilluassagunartoq Birger Poppel isumaqarpoq.

Eqqartorneqarnerpaanut ilaassagunarput, suliffeqarfissuarnut akileraarusersueriaatsit pilersinneqarnissaat aammalu pappiaqqanik niuernermi iluanaarutinut akitsuusiinerit.

Aammali eqqartugassat saneqqunneqarsinnaanngitsut ilagaat, inuiaqatigiit inuuniarnerminni atugarisaat pitsaasut, tassami allaavoq ataatsimiititaliarsuup isummersuutai allaallutillu inuiaqatigiit isummersuutaat.

- Nunatta aningaasarsiornikkut iluaqutigilersinnaasaat tassaapput suliffissuaqarfiit maanna aallartisarneqalersut. Tamannalu isumalluarnartutut oqaatigineqarsinnaavoq. Tamannali ima paasineqassanngilaq inuiaqatigiinnit tamanna kissaataanerpaasoq. Tassami ataatsimiititaliarsuup naatsorsuutigissavaa inuiaqatigiit allanik siunniussaqarsimaneri allanillu pingaartitsineri. Tamannali oqallinnermut aallarniutaalluarsinnaakutsoorpoq, Birger Poppel oqarpoq.

Taassuma naggasiullugu oqaatigaa, innuttanik ataatsimiisitsinerit nalunaaquttap akunnerini marlussunni sivisussusillit naammanngitsut. Inuiaqatigiit pilersaarummut peqataatinneqarluassappata piffissaq sivisooq atortariaqartoq oqaatigalugu.