Ilisimatooq: Inuiaqatigiit peqataanissaat pisariaqarpoq
- Annertunerpaamik sunniuteqarlutik oqalliseqataasut tassaapput Inatsisartuni ilaasortat partiinilu siuttut. Partiit immikkoortortaqarfii qinersisartullu annikippaallaamik oqalliput sunniutikillutillu, Axel Jeremiassen oqarpoq.
Nunatsinni tunngaviusumik inatsisitaarnissarput aatsaat saqqummiunneqalinngilaq. Inatsisartut 2008-mi upernaakkut ataatsimiinneranni aamma ukiakkut ataatsimiinneranni tamanna oqallisigineqarpoq.
Tamatumali kingorna tamanna ersarissumik innuttaasut akornanni oqallisigineqarani, soormitaava?
- Nalunanngilaq nunasiaataasimanerput annertuumik pissutaaqataasoq. Nunasiaataasimasunut allanut naleqqersuutissagutta, malunnaateqarluartut ilagaat aalajangigassani isiginnaartuinnaaasarsimanerput, taamaattumillu annikittuaraannarmik sunniuteqartarsimalluta, Axel Jeremiassen oqarpoq.
Inatsisartut ippassaq oqallinnerani Inuit Ataqatigiit ilaatigut imaattumik isummersuuteqarlutik saqqummiipput:
"Miserratissaanngilaq kalaallit oqaatsivut, kinaassuserput, kulturerput, issittormiutut naleqartitavut inuiattullu pingaartitavut danskit tunngaviusumik inatsisaatigut takussutissaqartinneqanngimmata".
- Namminerisamik tunngaviusumik inatsiseqalissagutta tamassuma iluaqutitarissavaa, qulaatiinnarluta avataaniit aalajangiisoqassaassammat, Axel Jeremiassen oqarpoq nangillunilu:
- Isummagut immitsinnullu inuiaqatigiittullu isiginnittaaserput tunaartarineqalissaaq aalajangiisuutinneqalerlunilu. Inuiaat allat aperisariaarutissavagut soorlu avataaneersut allatullu oqaaseqartut. Taamaallaat immitsinnut aperisalissuugut; inuiaqatigiit qanoq ittut pilersissavagut? Axel Jeremiassen oqarpoq nangillunilu politikerinut innuttaasunullu imaattumik oqariartuuteqarluni:
- Politikerit kisimik tamanna suliassarinngilaat, tamattali qanorluunniit oqaaseqaraluarutta inuiaqatigiinnilu qanoq inissisimanerput apeqqutaatinnagu, tamatta sunniuteqarsinnaanissarput pingaaruteqarluinnarpoq tunngaviusumik inatsisissap tunngavilerneqarnissaanut, inuiaqatigiilerinermik ilisimasalik aammalu inuiaqatigiit akornanni oqallinnernik ilisimasalik, Axel Jeremiassen taama oqarpoq.