Ilisimatooq: Inooriaatsit kingornutat katsorsaanissamut pilersaarummut inituallaarput

Imigassamik atornerluisoq ikiaroornartumillu atuineq unitsinniarutsigit akeqanngitsumik katsorsaaneq naammakkunnanngilaq.

Inooqaatigeeriaatsit pitsaasuungitsut taamatittariaqarpagut - suliffinnillu amerlanerusunik pilersitsilluta.

Napparsimasunik paarsinermik peqqissaanermillu Ilisimatusarfimmi immikkut ilisimasalik, Steven Arnfjord, taama isumaqarpoq. Taanna Naalakkersuisut pilersaarutaanni iluaqutaasinnaasunik aammali amingaataasinnaasunik isiginiagaqarpoq.

Martha Lund Olsenip kissaataa piviusunngorpat, imigassamik ikiaroornartumik pinnguaatinillu atornerluinermut katsorsartinnerit ajornannginnerulissapput katsorsartinnissarlu akeqassanngilaq.

Martha Lund Olsen atornerluisunut katsorsaavinnut amerlanerusunik aningaasaleerusuppoq katsorsaariaaserlu eqqarsaatigeqqeqqullugu.

Aamma atuaruk Atornerluinermut katsorsartinneq akeqartarunnaassaaq

Atornerluisoq atornerluisuuginnassasoq

Atornerluisut tamarmik immikkut katsorsarneqassapput, tassanilu atornerluisup ajornartorsiutai qiviallaaneqassapput.

Iliuusissaq ajunngilluinnarpoq, kisianni imaattariaqanngilaq katsorsaariaaseq taamaattoq atornerluisumut pitsaasuusoq. Steven Arnfjord taama isumaqarpoq.

Inooriatsinimmi pitsaanngitsunik kingornutat ataasiakkaallu ajornartorsiutaat qiviallaavallaarutsigit atornerluisoq ajornartorsiutinngortissavarput.

Taamaalioruttalu atornerluisoq atornerluisuuinnassaaq, Steven Arnfjord oqarpoq.

- Inuit ataasiakkaat avatangiisiminnit pilersitaapput. Tassalu inuit aggerfitsik kinaassuseraat. Ilaqutariinnit ajornartorsiutilinneersuuguit alliartorninni atugarliortuullutit imaluunniit inooqataanikkut iluatsitsinerliorsimaguit, taava pinngitsoornak taamaattunngupajaarissaatit. Taama isiginneriaasillit inuk nammineq eqqarsartuusoq namminiusutullu ittuusoq, taamaalillunilu arlalinnit periarfissaqartuusoq, puigortarpaat, Steven Arnfjord oqarpoq.Taanna isumaqarpoq, atornerluisut inuunerlunnermik kingornutaminnit eqqugaasutut oqaluuseriunnaartariaqarigut.

Makinnissamut pissutissaqartariaqartoq

Taava aamma allanik periuuseqartariaqarpugut. Paamiuni misilittakkat ilinniarfigalugit. Tassami Paamiut Asasarami atornerluisut attavigisartagaat saaffigineqartarput, taakkuami iluaqusiisarmata, Steven Arnfjord oqarpoq.

Suliassaq tunngaviani tassaavoq atornerluisup avatangiisiini inooriaaseq allanngortissallugu.

Tamatumanilu aalakuunginnerup ikiaruunnginnerullu pilerinartuujuarnissaa tunngaviliisuulluinnarpoq. Tamatumanilu atornerluisup nunaqarfiani illoqarfianiluunniit suliffiit sunngiffinnilu sammisassat allannnguisuulluinnarsinnaasut, ilisimatooq isumaqarpoq.

- Sumiiffinni ataasiakkaani inuussutissarsiutit suut ineriartortinneqarpat. Arlaannik isumalimmik ullut tamaasa makinnissamut pissutissaqartariaqarpoq, taamaanngippammi atornerluinermut utersaarnissaq qanittuararsuussaaq, Steven Arnfjord oqarpoq.

Aamma atuaruk Meeqqat imigassamik tupamillu atuinerat annertuallaarujussuartoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat