Ilisimatooq: Danmarkip Naalagaaffeqatigiinneq pisariaqartippaa
Naalagaaffeqatigiinneq atorunnaassappat Danmarkip nunani tamalaani soqutigisaanut akornutaassasoq, Hans Mouritzsen Københavnip ilisimatusarfiani seniorforskeritut atorfilik Danmarkimi atuagassiat ilaannut Ræson-imut oqarpoq. Atuagassiaq Ræson naalagaaffeqatigiinneq issittumilu pisuussutit pillugit immikkut ittumik ullumi sammisaqarpoq.
Hans Mouritzsenip ilimagilluinnarpaa, atlantikup avannaani nunat nammineernerulernissamik kissaateqassagaluarpata imaluunnit naalagaaffeqatigiinnermit anissagaluarpata Danmarkimut sunniuteqanngitsoornavianngitsoq.
- Qallunaat oqallinnermut peqataanerusariaqaraluarput naalagaaffeqatigiinnermillu tapersersuinerullutik. Ullumikkut aaqqissuussaaneq Christiansborgimut iluaqataaqaaq, naalagaaffeqatigiinnerlu atorunnaarsinneqassappat Danmarkip nunani tamalaani soqutigisaanut akornutaassaaq, Hans Mouritzsen danskit atuagassiaannut oqarpoq.
Aamma isumaqarpoq Savalimmiunut Kalaallit Nunaannullu ukiumoortumik tapiissutit isumaanut naleqqiutissagaanni ikeqisut.
-Naalagaaffeqatigiinneq annaassagutsigu soqutigineqarnerput aamma nungussaaq. Nunat tamalaat 2005-ip kingorna soqutiginninneruleriartormatali Kalaallit Nunaat Savalimmiullu Danmarkimut pingaarutilerujussuartut allaallu sorsunnerup nillertup nalaanisut pingaarutilerujussuartut inississimapput, Hans Mouritzsen nassuiaavoq.
Danmark naalagaaffiit tallimat issittup imartaanut atasut akornanniippoq, taamaanneratalu nunat tamalaat isaannit isigalugu oqaloqatissatut soqutiginartutut aamma isigineqalersissimavaa. Assersuutigalugu Danmark Ilulissat pillugu suliniummik 2007-imi ingerlatsisinnaasimavoq, tassani naalagaaffiit USA, Canada, Norge aamma Rusland issittumi aaqqiagiinngissutinik iluarsiiniarnermi isumaqatigiissusiormata Danmark akisussaasutut imminut inississinnaasimavoq kiisalu issittup imartaata killeqarfinnut agguataarneqarnerani suleqataasinnaalersissimallugu.
Nunanut allanut ministeriusimasup Holger K. Nielsenip Folketingimut januaarip 23-ani aamma uppernarsarpaa naalagaaffeqatigiinnerup ilusaa allanngortinneqassappat Danmarkip nunanit tamalaani soqutigineqarneranut sunnuteqassasoq, naalagaaffeqatigiinneq Danmarkip nunani tamalaani inissisimaneranut pingaaruteqaqisoq erseqqissarpaa.
