Ilisimatooq: Danmarkimi puisit eqqissisimatitaanerat pissusissamisuunngilaq ingasattajaarnerullunilu
-Kulturitsinni puisit arferillu illernartutut isigineqarput, tamanna ajornartorsiutaavoq iliuuseqarfigisinnaanatigulu, Thyge Jensen puisit arferillu pillugit ilisimatooq Danmarkip Radioanut oqarpoq.
Puisit amerliartoriarlutik ukiut qulit 15-illu qaangiukkaangata nappaateqalersarput, tamatuma kingunerisaanik ikilerujussuartarput affaasa missaannaanniilertarlutik. Killilersuisoqannginnera pissusissamisuunngilluinnartutut nalilerneqarpoq, puisi iluatinnaateqartutut atorluarneqarsinnaagaluartutullu isigineqarmat.
-Ukiut tamaasa pisassiisoqartalertuuppat puisip neqaanik amernillu tuniniaasoqarsinnaanngussagaluarpoq, asuli puisinik sumi tamaani toqungasunik tippassimasunik uninngatitsiinnartoqarani, Thyge Jensen nassuiaavoq.
Taanna aamma isumaqarpoq puisinik eqqissisimatitsineq ingasattajaarnerusoq aalisartullu ikioqqullutik nillianerat qinikkanit tusaaniarneqartariaqaleraluartoq eqqissisimatitsinerlu atorunnaarsillugu.
Danmarkimi puisinik eqqissisimatitsineq imaaliallaannaq atorunnaarsinneqarsinnaanngilaq, Hollandip Tysklandip Danmarkillu eqqissisimatitsinissamik immikkut isumaqatigiissuteqarnerat peqqutigalugu.