Ilisimatooq: CO2 pillugu anguniakkat annikippallaaqaat
Politikerit angusaqarluarniarnerusariaqartut taassuma oqaatigaa, atortummi tamatumunnga atugassat pigereerpagut, suliniutillu kingusinaartumik aamma saqqummiunneqarput, Jørn Hansen oqarpoq.
- Suliniutit ataatsimut isigalugit isumalluarnarput, anguniagalli ersarinnerullutillu sakkortunerusimasinnaanissaat kissaatiginaraluarpoq, suliniutillu qangali aallartinneqarsimasinnaagaluarput, Jørn Hansen oqarpoq, nangillunilu:
- Kyotomi isumaqatigiissut ukiut arfineq-pingasut matuma siornatigut atsiorneqarpoq, maannalu aatsaat suliniuteqartoqarnialerluni. Tamanna eqqarsarnartoqartippara, Jørn Hansen oqarpoq.
Kyotomi isumaqatigiissut naapertorlugu nunat CO2-mik aniatitsinertik 1990-imut naleqqiullugu 2012 naatinnagu 8 procentinik annikillisissimasussaavaat.
Uuliamik isumalluuteqarpallaarunnaarnissaq anguniagaavoq, suliniutillu tusarniaassutigineqarnerat ullumimut killeqarpoq:
- Nukissiuutit ataavartut, soorlu seqinisaatit, anorisaatit allallu innuttaasunit atorneqarnerulernissaat piumasaqaatigineqarsinnaagaluarpoq, uuliamik atuinerujussuaq tassuunatigut annikillisarneqarsinnaassagaluarmat, Jørn Hansen Radioaviisimut oqarpoq.
Illuliornermi malittarisassat sukannernerusinnaagaluartut taassuma oqaatigaa, illup oqorsarneqartarnera assersuutaalluni.
- Kalaalit Nunaanni issinneruvoq, illulli oqorsarluarneqartarnissaat piumasaqaataanngilaq, suliffeqarfiillu illuutaasa oqorsarluarneqarsimanngitsut takussaapput, taamaammat sukannernerusunik malittarisassaqartariaqaraluarpoq, ingeniørit siunnersuisartut Rambøllikkut Sisimiuni immikkoortortaqarfianneersoq oqarpoq.
CO2-mik aniatitsinerup annikillisarneqarnissaa pillugu suliniummi anguniakkat angumerineqarsinnaappat? Jørn Hansen aperaarput, akivorlu:
- Neriuutigilluinnarpara, inatsisilli amigaataapput, imaaliallaannarlugillu piviusunngortinneqarsinnaanatik. Piumassuseqaraanni anguneqarsinnaapput, misilittakkamali takutippaat angujuminaassassasut, Jørn Hansen oqarpoq.
2008-miit 2012-imut gassinik silaannarmik kissakkiartortitsisartunik aniatitsineq appartinniarlugu suliniutissat pillugit tusarniaaneq ullumimut killeqarpoq.