Ilisimatooq: Canadami siku ukiut arfinillit qaangiuppata peerutereersimassaaq

Taama oqarpoq nunap sananeqaataanik immikkut ilisimasalik David Barber, Canadami University of Manitoba-meersoq. Ilanngullugulu oqaatigalugu, immap sikua peeruppat inuit amerlanerusut Issittumukarumalissasut, tamannalu pitsaanngitsumik sunniuteqassasoq.

- Issittumi ukiukkut sikuujuaannassaaq, siunissamili sikorlaamik sikuusassaaq, Barber aviisimut Winnipeg Free Press-imut oqarpoq.

David Barberip naatsorsuinera najoqqutaralugu Issittup Imavittaa siullerpaamik 2015-imi aasakkut sikuerutissaaq.

- Tamanna pissutigalugu soqutigisaqaqatigiit arlalissuit Issittumut soqutiginnilersippai. Tamannalu issittumut ilungersunarsinnaavoq, minnerunngitsumik allanngoriartornerup sukkanerujussua pissutigalugu, oqarpoq.

Barberip misissuinermini manna tikillugu paasisani Issittumi silap pissusaata allanngoriartornera pillugu Nunat tamat ataatsimeersuarnerani Quebecimi sapaatip akunnerani matumani saqqummiunniarpai

Canadamiu ilisimatuutut misissuisoq taanna Issittup Ukiuinut atatillugu Issittup imartaanik misissuinermik ingerlataqartunut siuttuuvoq.