Ilisimatooq: Ajornerusumik atugaqartitsinissaq siunniuppaat
Tassami inuussutissarsiornikkut ingerlatassat angisuut pillugit nassuiaatiminni, Inatsisartuni ullumi saqqummiunneqartussami, Naalakkersuisut inassutigaat, inuussutissarsiornikkut ingerlatassani angisuuni sulisussat nunani allaneersut akissarsiakinnerussasut aammalu ilaatigut uagutsitulli sulinngiffeqarnissamut pisinnaatitaaffeqartigisanngitsut.
Aammali Naalakkersuisut illuanik nalunaarput, sulisoqarnermi inuuniarnikkut akissarsiatigullu atukkat tunngaviinik ajoqusiinermut akerliullutik.
Sulisoqarnermili inuuniarnikkut akissarsiatigullu atukkat tunngaviinik ajoqusiineq sunaava? Tamatuminnga ilisimasalik Radioavisimiit aperaarput:
- Sulisoqarnermi inuuniarnikkut akissarsiatigullu atukkat tunngaviinik ajoqusiineq taaguutaavoq allanngorarsinnaasoq, inatsisiliornermi taaguutitut atugaannginnamik. Taaguut politikikkut oqallinnermi atugaavoq, nunami pineqartumi sulinermi inuuniarnikkut akissarsiatigullu atukkat nalinginnaasunit appasinnerusutut nalilikkat suunersut nassuiarniarlugit.
Suliffeqarnermi pissutsinik ilisimatooq Københavnillu universitetiani suliffeqarneq suliffeqarfinnilu aaqqissusseriaatsit pillugit ilisimatusarfimmi pisortaasoq, Søren Kaj Andersen, taama oqaluttuarpoq.
Kalaallit Nunaanni inuussutissarsiornikkut ingerlatassat angisuut pilersinniarneqarneranni sinaakkutissatut piumasaqaatit pillugit Naalakkersuisut nassuiaataanni, Inatsisartuni ualimut oqaluuserineqartussami, inassutaavoq, sulisut nunani allaneersut atorneqassasut, taakkua "nunani tamalaani akissarsiat sulinermilu atukkat" tunngavigalugit akissarsiaqartinneqassallutik.
Naalakkersuisullu aamma inuussutissarsiornermi sulianut angisuunut tunngasunut inatsisissatut missingiummik suliaqareerput, tamatuminnga periarfissiisussamik.
Naalakkersuisulli erseqqissarpaat, sulisussanik atorfinitsitsinermi Nunatta nunani tamalaani pisussaaffini ataqqissagai, taamaammallu atugassaqartitsisoqassanngitsoq, sulisoqarnermi inuuniarnikkut akissarsiatigullu atukkat tunngaviinik ajoqusiinertut taaneqarsinnaasunik.
Sulisoqarnermili pissutsinik ilisimatooq qanoq isumaqarpa?
- Danmarkimi isiginninneq aallaavigigutsigu, akissarsiatigut ajornerulersitsinertut taasariaqarsoraara, Søren Kaj Andersenip nassuiaat atuareerlugu inerniliivoq, imalu ilassusiivoq:
- Sulisoqarnermi pissutsinik ilisimatuup isaanit isigalugit, aqqutissat nalinginnaanngitsut aqqutiginiarneqarput, ilisimatooq oqarpoq.
Naak ima aaqqiisoqassagaluartoq, akissarsiat minnerusut assersuutigalugu angalanermut, nerisanut najugaqarnermullu aningaasartuutit sulisitsisumit matussuserneqarnerisigut iluarsiisoqarluni, tamanna ajortoq, Danmarkimi sulisoqarnermi illua tungeriit isummiutereersimavaat.
- Tamakkua immikkoortinneqartariaqarput. Imaassinnaavoq, Nunani allaneersut suliartornermini immikkut ittunik aningaasartuutissaqartut. , kisianni taakkua akissarsianut ilassutit aaqqinneqartussaanngillat.
- Assersuutigalugu nerisanut najugaqarnermullu akiliisarnissaq sulisitsisup neqeroorutigippagu, taava tamanna sulisup akissarsiami saniatigut pissarsiassarisussaavaa, Søren Kaj Andersen isumaqarpoq.
Inatsisissatut missingiummi aamma allassimavoq, nunanit allaniit suliartortut sulinngiffeqarneq pillugu nunatsinni inatsimmi illersorneqassanngitsut. Aamma taanna eqqumiitsoq, Søren Kaj Andersen isumaqarpoq:
- Ajunngitsorsiassat, suliffeqarnermi nalinginnaasut, peerniarneqarnerat nalinginnaasuunngilaq, Suliffeqarnermi pissutsinik ilisimatooq Københavnillu universitetiani suliffeqarneq suliffeqarfinnilu aaqqissusseriaatsit pillugit ilisimatusarfimmi pisortaasoq, Kaj Andersen oqarpoq.
Alcoap marsimi 2011-imi erseqissarpaa, Maniitsumi aluminiuliorfiliussagunik, akissarsiakitsunik, soorlu Kinameeersunik, sanaartornermi sulisoqarnissaq piumasaqaatigigitsik allanngortinneqarsinaangitsoq.
Inuussutissarsiornikkut ingerlatassat angisuut pillugit inatsisissatut siunnersuummik Naalakkersuisut ukiaru ataatsimiinnermi saqqummiussissallutik naatsorsuutigaat.
