Ilisimatooq: Air Greenlandimi sulisut najummassimanartorsiortinneqarput
Nutarterneqarpoq 10.01.11, nal. 14.49
Air Greenlandip sulisut inaannit meeqqeriviinillu qaammammik ataatsimik piffissaliilluni anisitsiniarnerata kingorna Center for Arbejdsmarkedsforskningimi Aalborgimiittumi lektori, Jørgen Stamhus taama naliliivoq.
- Taamaaliornermikkut kattuffik sulisullu annertuumik najummassisimanartorsiortippaat. Taamaattumik qularnanngilaq kattuffiup eqqarsaatigeqqittariaqassagaa ilaasortami najummassimanartorsiortinneqarneranni isumaqatigiinniarnernut ilannguteqqiinnassanerlutik isumaqatigiissuteqarlutillu, Jørgen Stamhus oqarpoq.
Taanna nassuiaavoq taama iliortoqarnera Danmarkimi misilittagarineqanngitsoq aamma nalinginnaasuunngitsoq sulisunut inissiaateqartarneq meeqqallu paaqqinnittarfiisa ilanngunneqartarnerat. Naak timmisartortartut kisimik isumaqatigiissuteqarfigineqarsinnaanatik mattussaangaluartut, aamma timmisartumi saqisut mattunneqarput.
Air Greenlandip pisortaanera malillugu timmisartortartut saqisullu immikkooraluarlutik kattuffimmi ataatsimi tamarmik inissisimapput, taamaalillutillu imminnut tapersersoqatigiillutik suliumajunnaaratarsinnaallutik.
Suliffeqarnermut ilisimatooq Jørgen Stamhus malillugu, taamaaliortoqarpoq kattuffiup suliumajunnaarnermut aningaasartuutissanut ileqqaagai nungujaarneqarniassammata.
- Ilimanarpoq saqisut mattunneqarneranni kattuffik annerpaamik eqqorniarneqartoq. Mattussisarnerit isumaqatigiinniarnerit ajalusoorneri takussaasarput, siunertarineqartarporlu sulisitsisup sapinngisamik sakkussaminik nassaarniarnissaa, taamaalilluni sulisut isumaqatigiinniarnernut uteqqinnissaat sulisitsisullu piumasaanik akuersitinnissaat anguniarneqartarluni, Jørgen Stamhus oqarpoq.
Air Greenlandimi isumaqatigiinniarnerit ajalusoorneranni timmisartortartut saqisullu tamarmik iniminnik meeqqallu annaasaqartussaanngillat. Isumaqatigiinniartuni 161-init qulit ataallugit kisimik initik annaassagaat Air Greenland ilisimatitsivoq.
