Rasmus Leander qineqqusaarnerit malinnaaffigeqqissaarpai, qulequttallu pingaarutilli qinersinerup inerneranik aalajangiisuusoralugit.Assi: ILISIMATUSARFIK

Ilisimatooq: Aatsitassarsiulersaarneq siulittaasunngorniuunnerlu qinersinerup inerneranik aalajangiisuupput

Qulequttat pingaarutillit marluk qinersinerup inerneranut aalajangiisuusut, Ilisimatusarfimmi adjunkti isumaqarpoq. Siumut 1979-imili appassaanik illuatungiliuttuulerataannaavoq.

Kalaallit Nunaanni Inatsisartunut ippassaq marlunngornermi qinersisoqarpoq. Inuit Ataqatigiinniillu (IA) qinikkat amerlanerussuteqartut, kisitsinermi inernerit ullumi pingasunngornermi saqqummiussat takutippaat.

Tassa imaappoq, IA-p siulittaasua Múte Bourup Egede naalakkersuisunngortitsisussaatitaavoq.

Qulequttat pingaarutillit, tassa Kuannersuarni aatsitassarsiulersaarneq Siumumilu avissaartuunneq qinersinerup inerneranik aalajangiisuupput.

Ilisimatusarfiup Inuiaqatigiilerinermut, Aningaasaqarnermut Tusagassiornermullu immikkoortortaqarfiani adjunkti, Rasmus Leander Nielsen, taama isumaqarpoq.

- Kuannersuit qineqqusaarnermi oqallisaaqaaq. IA tamatumani ersarittorujussuarmik inissisimasarpoq. Inatsisartunut qinigaatitaqarnerpaaginnarani Kujataani kommunimut aamma qinigaatitaqarnerpaavoq. Tamanna Kuannersuit pingaaruteqarnerannik aamma ersersitsivoq, taanna oqarpoq.

Partii alla 1979-imili aappassaanik naalakkersuisunngortitsisussanngorpoq.

Rasmus Leander Nielsenip naalakkersuisunngortitsinissamut periarfissat arlaliusorai, IA-li Nalerarlu naalakkersuisoqatigiilissasut ilimanartorujussuuvoq.

Partiinit taakkunannga qinikkat katillutik 16-iusut amerlanerussuteqarlutik naalakkersuisoqatigiilernissaannut piumasaqaatinut naapertuupput.

Periarfissalli allanik aamma ilaqartut, Rasmus Leander Nielsen isumaqarpoq.

- Ulluni tulliuttuni isumaqatigiinniarnerit Siumut IA-llu naalakkersuisoqatigiilernerannik aamma kinguneqarataannaapput. Siumumi suli akerleriinneq tassani akornutaasinnaasut ilagaat, taanna oqarpoq.

Apeqqut: Partiit marluk aatsitassarsiulersaarneq pillugu akerleriittorujussuit qanoq suleqatigiissinnaagamik?

- Kalaallit Nunaanni politikkikkut aqutsineq ukiorpassuarni allanngoraqisoq nalorninartoqartikkunnaarsinnaavaat. Kalaallit Nunaata oqaluttuarisaanerani ataasiaannaratik naalakkersuisoqatigiinnikuupput, taanna oqarpoq.

- Taamaattoqannginnissaa qulakkiivissinnaanngilarput. Ulluni tulliuttuni isumaqatigiinniarnerit apeqqutaajumaarput, taanna oqarpoq.

Isummersuutit

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit