Ilisimasortaqarnissamik siunnersuut tapersersorneqarpoq

Ilaasartaatit 250-it sinnerlugit ilaasullit ilisimasortaqarnissaannik piumasaqaatitalimmik malittarissassat Inatsisartunit upernaakkut ataatsimiinnermi akuersissutigineqarnissaat naatsorsuutigineqarpoq.

- Ilisimasortaqarluni ingerlaartoqartalerneratigut ikkarluiut sumiinneri pillugit, Kalaallit Nunaani imaatigut angallannermi pissutsit immikkut ittut aammalu sikunut ilulissanullu tunngasut pillugit ilisimasaqartoqarnissaa qulakkeerneqarsinnaavoq. Umiarsuimmi taakku ukiup ilaani Akullersuarmi angalasarput kingornalu Issittumi aamma angalasarlutik, Birgit Sølling Olsen, Imarsiornermik Aqutsisoqarfimmi pisortaanerup tullia, Danmarkimi Umiarsuaatillit Peqatigiiffiata Issittumi imaatigut angallanneq pillugu ataatsimeersuartitsinerani, Royal Arctic Linep Aalborgip Umiarsualiviani allaffeqarfiani ingerlanneqartumi, ippassaq oqalugiartut ilaat taama oqarpoq.

Tamannalu isumassarsiatsialaasoq Royal Arctic Linep pisortaanera Jens Andersen isumaqarpoq, nangaanartoqartilaarpaali.

- Ilisimasortassanik sumiissusersiortunilluunniit naammattunik pissarsisinnaanersugut apeqqutaassaaq. Tunngaviatigulli isumaqataaffigilluinnarparput.

Kalaallit Nunaat Danmarkilluunniit inatsimmi nutaami piumasaqaatigineqartutut ilisimasortassanik naammattunik pigisaqannginnerat Albatros Travelip siornatigut aamma isornartorsiortarsimavaa. Imarsiornermilli Aqutsisoqarfiup tungaanit tamanna isumalluarfigineqarpoq.

- Immikkut ilisimasalinnik ilisimasortanngorniarsinnaasunik arlalinnik peqarpoq, taamaammat tamatuma iluatsinneqarsinnaanissaa isumalluarfigaarput, Birgit Sølling Olsen oqarpoq.

Inatsisit ataatsimoortut upernaakkut ataatsimiinnermi suliarineqartussat, umiarsuarnik takornariartaanik piginnittunut imartap sikoqassusaa apeqqutaatillugu piumasaqaatinik kiisalu ingerlaarnerminni umiarsuit allat peqatigalugit ataqatigiissaarisarnissaannut piumasaqaatinik aamma imaqassapput, ajutoortoqartillugu ikiuigasuartoqarsinnaanissaa siunertaralugu.