Ilisimasassarsiortut Upernavimmut tikilerput
Issittumi ilisimasassarsiortut pilersaarutit malillugit Upernavimmut unnugu tikissapput.
septembarip 13-at 2007 06:33
Ilisimasassarsiortut Frankrigimeersumit Sébastien Roubinet-mit siulersorneqartut, Amerika avannaqqullugu immakkut aqqut – Sullualuk aqqutigereersimallugu Nunatta imartaanut pereerlutik, Upernavimmut tikittussanngorput.
Upernavimmi takornarianut paasissutissiisarfimmeersut ilisimatitsissutigaat, aatsaavissuaq angallat motooreqanngitsoq katamaranimik taaneqartartoq atorlugu Sullualuk aqqutigineqartoq.
Ilisimasassarsiortut Manerassuarmit Alaska Canadalu avannaqqullugit Nunatta imartaanut anngupput, qaammatit pingasut ullullu 21-it angalareersimallutik.
Ilisimasassarsiortut siulersortaata Sébastien Roubinet-ip nammineq angallatertik imaatigut sikukkullu angallatissanngorlugu titartariarlugu sanatitaraa.
