Ilisimatusarfiup Illersornissamullu ilinniarfiup Issittumut ilisimasat ilaatigut sillimaniarnermut politikkimut naalagaaffiullu allanut attaveqarnermut tunngasut suleqatigiissutigissavaat.Assi: KNR / Anton Gundersen Lihn

Ilisimasaqarnerup nunarput Danmarkilu Issittumi siuttuutissagai

Issittumut soqutiginnittoqaleraluttuannarnera pissutigalugu nunatta sillimaniarneq naalagaaffinnullu allanut attaveqarneq ilisimasaqarfiginerusariaqarpai. Suleqatigiinnissamullu isumaqatigiissutip tamanna qulakkiissavaa.

Issittoq Kalaallit Nunaallu nunarsuarmiunit ukkatarineqallattaavoq. Nunarsuup avannarpasissua soqutigineqaraluttuinnarmat, nunarput pissaanilissuit qeqqanni inissisimasoq politikkikkut pingaaruteqarnerulerpoq.

- Nunarsuarmi pissutsinut nutaanut ikaarsaariartulerunarpugut – tassanilu Kalaalit Nunaat nunat tamalaat akornanni pingaaruteqarneruleriartuinnassaaq. Taamaammat Kalaallit Nunaata Danmarkillu Issittumi nunanut allanut attaveqarnermut sillimaniarnermullu politikkimut ilisimaqarnerunissaq ilisimatusarnerunissarlu pisariaqartippaat, Ilisimatusarfimmi rektori Gitte Adler Reimer oqarpoq.

AAMMA ATUARUK Nunarput pissaanilissuarnit ukkatarineqartoq: Iluaqutigisinnaavarput

Rektori Ilisimatusarfiup Danmarkimilu Illersornissamut ilinniarfiup akornanni Issittoq pillugu paasisimasanik avitseqatigiittarnissamut ilinniartitaanermilu suleqatigiinnissamut paarlaateqatigiittarnissamullu isumaqatigiissuteqarpoq.

Gitte Adler Reimerip suleqatigiinnissaq qilanaaraa. Aamma Illersornissamut ilinniarfimmi dekanip Peter Dahl Thuelsenip qilanaaraa. Taassuma suleqatigiinneq Naalagaaffeqatigiit Issittumi pissaaneqarniunnermi inissisimanerannut pingaaruteqarsinnaasoraa.

Naalagaaffeeraannaanngitsoq

- Ilinniarfeqarfitta akornanni qaninnerusumik suleqatigiilerneq Kunngeqarfiup naalagaaffeeraannaanani issittumi siunissami suliaqarnermi siuttutut inissisimanissaanut tapertaassaaq, dekan oqarpoq. 

AAMMA ATUARUK Rusland Ilulissani ataatsimeersuarnissamut suli tikilluaqqusaasoq

Aamma ilinniartitaanermut, kultureqarnermut nunanullu allanut tunngasunut naalakkersuisup, Ane Lone Baggerip (S) isumaqatigiissuteqarneq nuannaarutigaa. Taassuma Issittumi najugaqartut najukkatik pillugit ilisimasanik tapersiisarnissamut periarfissagissaarnerulernissaat immikkut maluginiarpaa.

- Uagut Issittumi najugaqartuusugut Issittumik nassuiasuunissarput sulissutigissavarput, tassanilu Kalaallit Nunaanni ilisimasanik ineriartortitsineq aallaavissatsialaasoq isumaqarpunga, Ane Lone Bagger oqarpoq.

Illersornissamut Ilinniarfiup Issittumi sillimaniarnermut politikki allanngoriartorfiusumik qulequtalimmik Nuummi oktobarip aallartinnerani ataatsimitsimeersuartitsineranut atatillugu ilinniarfiit marluk akornanni isumaqatigiissuteqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat