Ilisimasallit tusarniaavigeqqaarniarpaat
Greenpeace-imeersut inuit 180-it Bruxellesimi Ministerrådimik assersuisut ilumuunngillat, oqaramik ministerit biologit tusaanianngivillugit aalisagartassanik aalajangersaasartut, Eva Kjer Hansen erseqqissaavoq.
Tamanna Greenpeace-imeersut isumaqatiginngilaat.
- EU-mi aalisarnermut ministerit aalisagartassiisarnerisa kinguneranik ullumikkut aalisarneq piujuaannartitsinissamik tunngaveqanngilaq, ippassaq taama oqarpoq immami uumassusilinnik ilisimasalik Greenpeace-imullu ilaasortaq Hanne Kærgaard Lyng Winther.
EU-mi avatangiisinut ministerit aalisagartassiissutissat pillugit isumaqatigiinniartalernissaat Greenpeacemit kissaatigineqarpoq, tassami aalisarnermut nunalerinermullu ministerit isumaqatigiinniaraangata aningaasarsiornissaq pingaartinneqarnerusarmat, taamaalillunilu aalisagartassiissutit amerlanaarneqartarlutik.
Tamannali inuussutissanut ministerip Eva Kjer Hansenip eqqunngitsuunerarpaa, Greenpeacermiullu kukkusumik paasinnissimanerarlugit.
Inuussutissanut ministeri aqagu ilanngullugu ministerit allat 26-t aalisagartassat pillugit isumaqatigiinniaqatigissavai.
