Ilisimasallit: Marlukkaartarnissaq siunnersuutaajunnaareerpoq

- Isumannaallisaaneq pivarput. Ajunaartoqaleraluarpallu annaassiniarsinnaaniassagutta upalungaarsimanissarput aalajangiisuulluinnarpoq. Tamannalu qanittumi umiarsuaqarneratigut qulakkeersinnaavarput. Tassalu taamaaliorneq inuup inuuneranik annaassinermik kinguneqarsinnaavoq, Imarsiornermut Qullersaqarfiup allaffiani pisortaq, Per Sønderstrup, qaammat kingulleq taama oqarpoq.

Taannalu isuma, Jens B. Frederiksenip akuersaarfigaa:

- Pitsaasumik aaqqissuunneqarsinnaappat, inuussutissarsiornermut aallutalinnut annertuumik ajoqutaanngippat soorunami ajunngitsutut isigiumaarparput. Kisianni siunnersuut naammassineqarpat, takoreerutsigulu isummerfigiumaarparput. Attaveqarnermut Naalakkersuisoq, Jens B. Frederiksen oqarpoq.

Hans Otto Kristensen, umiarsualiornermut ingeniøriuvoq. Ilisimasalittullu Imarsiornermik Qullersaqarfik peqatigalugu, umiarsuit takornariartaatsit aaqqissuusseqatigiillutik Nunatta imartaani angalasalernissaannut inatsisinik atulersitsiniarlutik kimigiisersimavoq.
Pissuteqanngitsumillu inatsisit allanngortinniarlugu kimigiisinngilaq:
- Isumassarsiap tunngaviatigut pissusia Sikuiuitsumi Kujallermi ukiut tallimat arfinillit matuma siornatigut atorsinnaassuseqartoq takuarput. Tassami norskit takornariotartaassuat takornariaratammut allamut annaasiniutitut taamani atorpoq, Hans Otto Kristensen oqarpoq.
Taamaattorli umiarsuit takornariartaatsit angalanerannut inatsisit qanittukkut allanngussamaarpasinngillat.
Nunanimi tamalaani inatsisissaq - polarkodemik taagorneqartoq, ukiut marluk qaangiuppata aatsaat piariissangatinneqarpoq.