Ilisimasalik: Oquk toqussutigineqarsinnaavoq

- Inuit napparsimalernissaminnut qanittut soorlu anersaartorniarnermikkut ajornartorsiuteqartut asmartut, inuunerminnik uloriartorsiulersinnaapput, taama oqarpoq illup iluani silaannaq pillugu immikkut ilisimasalik, Lars Gunnarsen.

Sapaatip akunnera kingullermi radioaviisip najugaqarfiit oqoqartut sammivai. Inissiaatileqatigiiffiit INI A/S aamma Iserit A/S inissiaatimik oqummik eqqugaasimasut amerlassussiat ilisimanngilaat.

Inuit sanngiinnerusut napparsimasulluunniit oqummik eqqornerlunneqarneq ajortut Lars Gunnarsenip oqaatigaa:

- Inuit peqqissumik inuusut, najugaqarfigisaat oquppat napparsimalissutigisinnaavaat, qasusalersinnaapput, niaqorluttalerlutik, anersaartorniarnermikkut ajornartorsiuteqalerlutik, isaasalu qaqortortai aappillersinnaalutik.

Taamaattumik najugaqarfigisaq oqoqalersimappat piaartumik qanoq iliuuseqartoqartariaqarpoq.

- Qanoq iliuuseqarfiginngikaanni inuit peqqissut anersaartorniarnerminnik ajornartorsiuteqalersinnaapput, astmaqalerlutik aammalu sapigaqalersinnaallutik ulluinnarnilu inuunerminni peqqissumik inuunerat ajoquserneqassalluni, niaqorluttarneq qasusarnerlu pissutigalugit, Lars Gunnarsen oqarpoq.

Lars Gunnarsenip taamatut oqarneratigut nunatsinni peqqinnissakkut nakkutilliisuutitap Børge Sommerilu isumaat assiiginngillat.

Børge sommer, peqqinnissakkut nakkutilliisutut paarlaattaasoq, sapaatip akunnerani kingullermi KNR-imut oqarpoq, najugarisaq oqukkaangat najugaqartut anersaartorniarnermikkut ajornartorsiuteqartut kisimik ajornartorsiulertartut.

Najugarisap oqunneratigut napparsimalernermik kinguneqarnavianngitsoq qulakkeerlugu Børge Sommerip oqaatigaa.

Taamattorli immikkut ilisimasimassallit isumaqatigiillutik oqaatigaat, najugarisat oqullit najugarisanut ajoqutaasut, taannarpiarlu pillugu ajornartorsiutip qanoq iliuuseqarfigineqartariaqarnera oqaatigalugu.

- Najugarisat aningaasarpassuit atorlugit sananeqarsimasut oqoqalersimasut asiusullu akuerineqarsinnaanngillat naalagaaffiup sanaartornermut ilisimasarfiani illup iluani silaannaq pillugu immikkut ilisimasalik Lars Gunnarsen oqarpoq.

Inigisat najugaqarfiillu qassit oqunnersut, Inissiaatileqatigiiffiit INI A/S-ip Iserit A/S-illu ilisimanngilaat.

Inissiaatileqatigiiffiit najugaqartunit ullut tamaasa saaffigineqartarput najugaqarfigisatik oqunneri pillugit.